Սովորաբար մարդկանց մեծամասնությունը դժվարությամբ է փոխում իր անկողնային պայմանները՝ տեղը, դիրքը, փափկությունը և դժվար է հարմարվում քնի նոր միջավայրին։ Եվ դա իրականում նորմալ է, քանի որ քունն օրվա այն պահն է, երբ մեր մարմինն ուզում է առավելագույնս լիցքաթափվել և հանգստանալ, իսկ դա հնարավոր է միայն հարազատ ու հարմարավետ միջավայրում։
Սակայն երբեմն քնի համար հարազատ միջավայր չի նշանակում քնի հարմարավետ և առողջ միջավայր։ Իսկ ո՞րն է պատճառը։ Պատճառները կարող են տարբեր լինել՝ սկսած սենյակային պայմաններից, մահճակալի ձևից, նյութից, մինչև անկողնային պարագաներն ու ներքնակը։ Այս հրապարակման մեջ կխոսենք հենց ներքնակը փոխելու մասին, քանի որ ներքնակին է պատկանում մեր անկողնային պայմանների առյուծի բաժինը։ Եթե հարմար է ներքնակը, ուրեմն մեծ հաշվով հարմար է նաև անկողինը, թեև այստեղ պետք չի մոռանալ նաև անկողնային պարագաների մասին։
Ե՞րբ կարելի է մտածել ներքնակը փոխելու մասին․
Առիթ 1․ Ներքնակը սկզբում հարմարավետ էր, իսկ հետո սկսել է անհարմարություն պատճառել։
Նման դեպքի պատճառները շատ են․ կարող է հետևանք լինել ներքնակի և մահճակալի չափերի անհամամասնության, այսինքն՝ ներքնակն ավելի լայն ու երկար է, քան՝ մահճակալը, ինչի հետևանքով սեղմվել է և շարքից դուրս եկել։ Կարող է հետևանք լինի ներքնակի վրա երեխաների կամ մեծահասակների՝ ողջ հասակով կանգնելու կամ թռչկոտելու։ Եվ ի վերջո անհարմարության պատճառը կարող է լինել ցածրորակ հումքը՝ զսպանակների կամ լցանյութի վատ մշակումը և այլն։ Այս դեպքերից խուսափելու համար խորհուրդ է տրվում ներքնակ գնել միայն մասնագիտացված խանութներից և նախապես խորհրդատվություն ստանալ մասնագետից։
Առիթ 2․ Արթնանալիս ունենում ենք ողնաշարի կամ պարանոցի ցավեր
Սա ևս ամենատարածված դժգոհություններից է հաճախորդների շրջանում։ Ընդ որում, այսպիսի գանգատներ կարող են ունենալ ինչպես հին, այնպես էլ լրիվ նոր ներքնակ օգտագործողները։ Իսկ ո՞րն է խնդիրը։ Նախ հիշենք, որ ներքնակների շուկան բազմազան է, և այդ բազմազանությունը հիմնված է ոչ միայն գույնի, չափի ու ձևի վրա, այլ նաև ներքնակների առանձնահատկությունների և ֆունկցիաների։ Երբ հաճախորդը գանգատներ ունի ողնաշարի կամ պարանոցի շրջանում ցավերից, ապա մասնագետները, որպես կանոն, խորհուրդ են տալիս օգտագործել օրթոպեդիկ ներքնակներ, որոնք ունակ են ճիշտ աջակցություն ցուցաբերել ողնաշարին, նպաստում են մկանների թուլացմանը և արյան շրջանառության կարգավորմանը։ Այսինքն՝ մինչ մենք քնած ենք, օրթոպեդիկ ներքնակն «աշխատում է» մեր օգտին։
Առիթ 3․ Առավոտյան հաճախադեպ են դարձել ալերգիկ ռեակցիաները և այտուցները
Սովորաբար մարդկանց, ովքեր առավոտյան արթնանում են ալերգիկ ռեակցիաներով, մտերիմները խորհուրդ են տալիս փոխել բարձը կամ առհասարակ անկողնային պարագաները։ Այս խորհրդի մեջ կա ճշմարտություն, որովհետև անկողնային պարագաների ոչ բոլոր գործվածքներն ու լցանյութերն են անվտանգ մաշկի համար։ Սակայն ինչպես արդեն նշեցինք, ներքնակը մեր անկողնային պայմանների ամենակարևոր մասն է, հետևաբար ալերգիայի պատճառները գտնելու համար արժե ուսումնասիրել նաև ներքնակի բաղադրությունը։
Երկար ժամանակ չօդափոխելու և քիմմաքրում չենթարկելու հետևանքով հնարավոր է ներքնակի մեջ հայտնվեն վնասակար բակտերիաներ և միջատներ, որոնք, բուն դնելով լցանյութերի մեջ ու բազմանալով, գիշերը հայտնվելում են մեր անկողնում և վնասելում մեր մաշկը։ Եթե արդեն «միջատաշատ» ներքնակները փրկել հնարավոր չէ, ապա խորհուրդ է տրվում նոր գնած ներքնակը պարբերաբար օդափոխել և տարին գոնե մեկ անգամ քիմմաքրման տանել, ինչպես նաև օգտագործել ներքնակերես։
