Չնայած այն բանին, որ ներքնակների բնական լցանյութերի շարքում ձիու մազը ամենատարածվածը չի, դրա կիրառությունն ու առավելությունները մարդկությանը հայտնի են եղել շատ ավելի վաղ ժամանակներից, քան կարելի է պատկերացնել։ Դեռևս հին դարերում մարդիկ գիտակցել են այս հումքի հարմար և առողջարար բնույթը և կիրառել այն ներքնակների մեջ։ Իհարկե այսօր այդ հումքի մշակման տեխնոլոգիան էապես տարբերվում է դարեր առաջ կիրառված ձևերից և զգալիորեն մեծացնում է լցանյութի օգտակար հատկությունները։
Ի՞նչ է ձիու մազը և ինչպե՞ս են այն ստանում։
Բնական այս լցանյութը ստանում են հատուկ պայմաններում բուծված ձիերի պոչից և բաշից։ Կարևոր է նշել, որ մազը ձեռք բերելու արդյունքում կենդանին չի տուժում։ Այնուհետև մազը մանրակրկիտ լվացվում է, մաքրվում յուղից, կեղտից, ապա անցնում հատուկ մանրէազերծում և լատեքսացիա (լատեքսի բարակ շերտով պատում, որը երկարեցնում է նրա կիրառության ժամանակը)։ Լատեքսացիան մազին հաղորդում է նաև փափկություն և առաձգականություն, ինչն անչափ կարևոր է ներքնակում նրա ունեցած դերի համար։
Նախնական մանրակրկիտ մշակման ու լատեքսացիայի շնորհիվ այս լցանյութին խորթ են դառնում տհաճ հոտը կամ իր մեջ միջատների բազմացումը։ Որպես քնի համար հիգիենիկ միջավայր՝ ձիու մազից պատրաստված ներքնակները խորհուրդ են տրվում ալերգիկ հակումներ ունեցող մարդկանց։
Ի՞նչ առավելություններ ունի ձիու մազից լցանյութը։
Ամրությունն այս լցանյութի ամենակարևոր առավելություններից մեկն է։ Ձիու մազից շերտը նպաստում է ներքնակի երկարակեցությանը, բայց և ունի օրթոպեդիկ հատկություններ։ Այս առումով այն շատ նման է կոկոսի մանրաթելերից պատրաստված լցանյութին, որը ճիշտ աջակցություն է ապահովում ողնաշարին, թուլացնում է ողնաշարային ցավերը և լարված մկանները։ Մասնագետները փաստում են, որ ձիու մազից և կոկոսի մանրաթելերից պատրաստված լցանյութերի համադրությամբ հնարավոր է հասնել օրթոպեդիկ աջակցության և ներքնակի երկարակեցության համար առավելագույն արդյունքի։
Ձիու մազը հեշտությամբ կլանում է խոնավությունը, ստեղծում քնի համար իդեալական պայմաններ, փոշի չի հավաքում, օգնում է ներքնակին օդափոխվել։ Բացի այդ աչքի է ընկնում նաև ջերմամեկուսացնող հատկություններով, ինչի շնորհիվ այն կարելի է կիրառել և՛ ամռանը, և՛ ձմռանը։
Այս բոլոր հատկությունները թույլ են տալիս, որ ձիու մազից լցանյութը կիրառելի լինի ոչ միայն զսպանակավոր և առանց զսպանակի ներքնակներում, այլ նաև փափուկ կահույքի արտադրության մեջ։
Ձիու մազից պատրաստված լցանյութի միակ «թերությունը թերևս բարձր գինն է։ Հաշվի առնելով հումքի սակավությունը, մշակման բարդ տեխնոլոգիան՝ այն համարվում է թանկարժեք լցանյութ և հայտնվելով ներքնակներում, բարձրացնում է դրանց գինը։
Ձիու մազից պատրաստված լցանյութի շերտ ունեցող ներքնակների դեպքում անչափ կարևոր է ժամանակին օդափոխումը և քիմմաքրումը, մինչդեռ ինքնուրույն սխալ խնամքը կարող է վնասել ներքնակը։
