Մանկական հանդարտ քունը կախված է այն միջավայրից, որտեղ նա քնում է։ Ընտրելով էկոլոգիապես մաքուր հումքից պատրաստված օրորոց և անկողնային պարագաներ՝ մենք ապահովում ենք նրա խաղաղ քունը, իսկ դա իր հերթին փոքրիկի առողջության գրավականն է։
Մանկական ներքնակների մասին խոսել ենք տարբեր առիթներով և թերևս կողմնորոշվել ենք, թե որ ներքնակներն են նախընտրելի փոքրիկների ողնաշարի ճիշտ ձևավորման համար։
Այս հրապարակման մեջ կխոսենք մանկական անկողնու այնպիսի կարևոր պարագայի մասին, ինչպիսին վերմակն է։
Մանկական վերմակն ունի երկու նշանակություն․ տաք պահել փոքրիկին և պաշտպանել արտաքին ազդեցություններից։ Այս երկու առաքելության համար մեծ կարևորություն ունեն վերմակի գործվածքը, լցանյութը, չափսերը։
Մանկական վերմակ ընտրելիս պետք է հաշվի առնել այն կարևոր հանգամանքը, որ փոքրիկների մաշկը շատ զգայուն է, և ոչ բնական նյութերը կարող են գրգռել այն, ալերգիկ ռեակցիաներ առաջացնել։ Այդ պատճառով խորհուրդ է տրվում մեծ ուշադրություն դարձնել այն գործվածքին, որից պատրաստված է վերմակի երեսը։
Ցանկալի է նախապատվությունը տալ բամբակից կամ շնչող և բնական այլ նյութերից պատրաստված գործվածքներին։ Դրանք հեշտությամբ օդափոխվում են, չեն կլանում տհաճ հոտերը, քրտինքը, օգնում են փոքրիկի մաշկին շնչել և զերծ մնալ գրգռվելուց ու կարմրելուց։
Փոքրիկների համար վերմակ ընտրելիս ամենակարևոր կողմնորոշիչը կլիման է։ Այն բնակավայրերում, որտեղ ձմեռները երկար են կամ բնակարաններում տաք ջերմաստիճան չի ապահովվում, կարևոր է, որ վերմակը կարողանա համապատասխան ջերմություն ապահովել փոքրիկի համար, բայց միևնույն ժամանակ չքրտնեցնի, իսկ անկողինը չդարձնի շոգեբաղնիք։
Վերմակների լցանյութերը պետք է համապատասխանեն սեզոնին։ Եթե ամառները նախընտրելի են մուսլինե, բամբակե, իսկ վաղ աշնանն ու ուշ գարնանը նաև ֆլիսե ծածկոցները, ապա ձմեռվա համար խորհուրդ է տրվում փոքրիկների համար ունենալ ջերմամեկուսիչ հատկություններով լցանյութից պատրաստված վերմակներ։ Իսկ այդպիսի լցանյութեր են համարվում․
- բնական բուրդը,
- սագի փետուրները,
- հոլոֆայբերը,
- սինտեպոնը։
Մանկական վերմակի ընտրության հարցում մեծ նշանակություն ունեն չափսերը։ Այս հարցում պետք է կողմնորոշվել ոչ միայն երեխայի հասակով, այլ նաև օրորոցի կամ մահճակալի չափսերով։ Որպես կանոն դասական են համարվում 120x60սմ չափս ունեցող վերմակները։ Նորածինների անկողինների դեպքում հանդիպում ենք նաև 100x80սմ կամ 140x110սմ չափս ունեցող վերմակների։
Ցանկացած դեպքում պետք է հաշվի առնել մի կարևոր հանգամանք․ վերմակը պետք է ծածկի երեխայի մարմինը, որպեսզի փոքրիկը չմրսի, բայց և չպետք է այնքան մեծ ու ծավալուն լինի, որ անզգուշորեն վերմակի տակ հայտնվելու և շնչահեղձ լինելու վտանգ դառնա։
