Ժամանակակից ներքնակներն իրենց կազմության մեջ ունեն ամուր անհատական կամ առանձին զսպանակներ, բուժիչ նշանակություն ունեցող մթելներ, բարձրորակ սպունգ, որոնք ավելի հարմարավետ են դարձնում մեր հանգիստը և ավելի առողջ՝ մեր քունը։
Սակայն որքան էլ որակյալ լինի ներքնակը, նրա մակերեսի վրա լաքաների կամ փոշու հայտնվելը կարող է իսկական գլխացավանք առաջացնել, իսկ թանկարժեք քիմմաքրման տանելը միշտ չէ, որ մատչելի տարբերակ է, դեռ ավելին՝ կարող է վնասել ներքնակը։
Հետևաբար ինչպե՞ս խնամել ներքնակը։
Շուրջ 15 տարի առաջ անկողնային պարագաների շուկայում սկսեցին լայնորեն տարածվել ներքնակերեսները (ռուս․ наматрасник): Դրանք տարբեր հումքերից պատրաստված և տարբեր հաստության ծածկոցներ են, որոնք անց են կացվում ներքնակների վրա, պաշտպանում ներքնակը խոնավությունից և կեղտոտվելուց, հեշտ են լվացվում և կարող են երկար ծառայել։
Գոյություն ունի ներքնակերեսների մի քանի տեսակ՝ պայմանավորված դրանց նշանակությամբ։
1. Շտկող ներքնակերես (տոպպեր)
Այս տեսակի ներքնակերեսները ոչ միայն կարող են շտկել ներքնակի մակերեսին առաջացած խորդուբորդությունները, այլ նաև ծառայել որպես օրթոպեդիկ տոպպեր, հավելյալ ամրություն հաղորդել մեր ներքնակին՝ օգնելով մեր ողնաշարին ուղղվել։
2. Պաշտպանիչ ներքնակերեսներ
Այս տեսակը, շնորհիվ իր կազմության, պաշտպանում է մեր ներքնակը փոշուց ու կեղտից, իսկ մեզ՝ բակտերիաներից։ Պաշտպանիչ ներքնակերեսների խմբին են պատկանում նաև անջրանցիկ ներքնակերեսները, որոնց գործածությունը շատ կարևոր է փոքրիկների և որոշ հիվանդություններ կրող մեծահասակների դեպքերում։
Ինչի՞ն ուշադրություն դարձնել ներքնակերես ընտրելիս․
Կազմությանը
ներքնակերեսի կազմությունը շատ կարևոր է, քանզի դրանից է կախված նրա ֆունկցիոնալությունը և երկարակեցությունը։ Օրինակ՝ բարակ բրդե հումքով ներքնակերեսներն ավելի երկար են ծառայում, կլանում են մարմնի խոնավությունը և անմիջապես չորացնում այն։ Համենայն դեպս, ընտրություն կատարելիս պետք է հաշվի առնել բամբակի, բրդի կամ սինտեպոնի նկատմամբ ալերգիկ հակումները և կլիմայական պայմանները։
Չափսերին
Ներքնակերեսը պետք է համապատասխանի մեր ներքնակի չափսերին, որպեսզի քնի ընթացքում չտեղաշարժվի և չանհանգստացնի մեզ։
Ամրացման ձևին
Որպեսզի ներքնակերեսը ծառայի իր նպատակին, պետք է ամուր կպչի ներքնակին, ուստի կարևոր է նաև ստուգել ամրակների՝ ռետինե ժապավենների որակը և ամրությունը։
