Սովորաբար ներքնակ ընտրելիս կարևորում ենք նրա լայնությունն ու երկարությունը՝ համարելով, որ այդ երկու պարամետրերն են, որ կապահովեն ներքնակի ճիշտ տեղադրումը մահճակալի մեջ։
Մենք բազմիցս խոսել ենք այն մասին, որ երբ ներքնակը չափերով չի համապատասխանում մահճակալին, ապա ռիսկ կա շուտ շարքից դուրս գալու, մաշվելու, դեռ ավելին՝ հարմարավետ քունն այս դեպքերում մղվում է երկրորդ պլան։ Սակայն շատ հաճախ հաճախորդները մոռանում են ներքնակի երրորդ պարամետրի՝ բարձրության մասին, որից, փաստորեն շատ բան է կախված։
Նախ դիտարկենք, թե ինչով է պայմանավորված ներքնակի բարձրությունը։
Ներքնակի բարձրությունը կազմում են նրա մեջ առկա բաղադրիչները՝ զսպանակային բլոկի տեսակն ու բարձրությունը, լցանյութերի տեսակները, քանակն ու շերտերի հաստությունը։
Օրինակ՝ առանց զսպանակի ներքնակները, որոնց բաղադրությունը միատարր է, բարձր չեն լինում։ Դրանց բարձրությունը սովորաբար 10-20սմ է։
Կախված այն բանից, թե ում համար է նախատեսված ներքնակը, բարձրությունը կարող է տարբեր լինել։ Նորածինների և փոքրիկ երեխաների համար օպտիմալ է համարվում ներքնակի 6-8սմ բարձրությունը, դեռահասների դեպքում՝ 8-15սմը, իսկ մեծահասակների համար ներքնակի հարմարավետ բարձրությունը սկսվում է 16սմ-ից։ Այս պարագայում պետք չի մոռանալ, որ մեծահասակների խմբում են օրթոպեդիկ ներքնակի կարիք ունեցողները, մարմնի ծանր քաշ ունեցողները, հղիները, տարեցները և բոլոր այն մարդիկ, որոնց հատուկ բաղադրությամբ ներքնակներ են անհրաժեշտ։
Ինչպե՞ս հասկանալ, թե ինչ բարձրությամբ ներքնակ է ձեզ հարկավոր։
Ճիշտ բարձրությամբ ներքնակ ընտրելու համար նախ պետք է հաշվի առնել տարիքային, ֆիզիոլոգիական հատկությունները։ Երբ բժիշկը ցուցել է օրթոպեդիկ ներքնակ, նշանակում է այն պետք է կազմված լինի չկապակցված զսպանակային բլոկից, կոկոսի մանրաթելերի շերտից, լատեքսից կամ այլ լցանյութերից, որոնք իրենց հերթին ավելացնում են ներքնակի ընդհանուր բարձրությունը։
Ֆիզիոլոգիական չափումներից հետո գալիս է մահճակալը չափելու հերթը։ Ցածր մահճակալների համար, որոնց բարձրությունը մինչև 35սմ է, ցանկալի է ընտրել բարձր ներքնակներ, որոնք կհեշտացնեն անկողնուց վերկենալու շարժումը՝ նվազեցնելով ջանքերը։ Նույնն, ի դեպ, խորհուրդ է տրվում նաև տարեցների համար ներքնակ ընտրելիս։ Ավելի բարձր, մինչև 70սմ բարձրություն ունեցող մահճակալների դեպքում բարձր ներքնակ ընտրելով է՛լ ավելի ենք բարձրացնում անկողինը, ինչը կդժվարացնի նրանից օգտվելը։
Մյուս կարևոր հանգամանքը, որը պետք է հաշվի առնել, մահճակալի խորությունն է։ Դասական ոճի մահճակալները պատրաստվում են ցածր կողամասերով, որոնց նպատակը կանխելն է, որպեսզի ներքնակը չսահի։
Երբ մահճակալի խորությունը մեծ չի, օրինակ՝ 5սմ է, ապա ներքնակի օպտիմալ բարձրությունը մինչև 15սմ է։
6-10սմ խորությամբ մահճակալների համար նախընտրելի են 18-22սմ բարձրությամբ ներքնակները։
10-15սմ խորությամբ մահճակալների դեպքում խորհուրդ են տրվում 23սմ-ից բարձր ներքնակները։
Հաշվի առնենք նաև, երբ ներքնակի մեծ մասը մնում է «դրսում», ապա վտանգ կա ժամանակից շուտ ձևախեղվելու։
