Օրվա ընթացքում մարդն աշխատում է, հոգնում ու նորից ուժերը վերականգնելու համար անհրաժեշտ է հանգստանալ։ Քունը ցանկացած օրգանիզմի համար կենսական նշանակություն ունի։ Բայց թե որքան քնել, ինչին ուշադրություն դարձնել առողջ քուն ունենալու համար քչերը գիտեն։ Երբևէ ինքներդ ձեզ հարցրե՞լ եք՝ արդյո՞ք կարևոր է միևնույն ժամին քնել ու արթնանալը։
Առաջարկում ենք ծանոթանալ մի քանի կարևոր խորհուրդների, որոնք կօգնեն ձեզ բարելավել ձեր քնի որակը։ Թարմ մտքերով, հանգստացած նյարդային համակարգով արթնանալը կարևոր է օրը հաջող անցկացնելու համար։ Ուշադրություն դարձրեք ձեր ու ձեր մտերիմների քնին, առողջ քունն առողջության, լավ տրամադրության գրավականն է։
1. Անհրաժեշտ է ռեժիմ ձևավորել
Որպեսզի քունն առավելագույնս օգուտ տա և հնարավորինս քիչ վնաս, պետք է պառկել քնելու և արթնանալ միևնույն ժամին։ Երբ խախտվում է այս ռեժիմը, խախտվում է նաև ձեր բիոլոգիական ժամացույցը՝ բիոռիթմը։ Դժվար է պատկերացնել, բայց բժիշկները հորդորում են քնի ռեժիմը չխախտել նաև հանգստյան օրերին։ Որպես օրինակ՝ կարող եք ուշադրություն դարձնել փոքր երեխաներին։ Նրանք անկախ աշխատանքային կամ հանգստյան օրերից արթնանում են միևնույն ժամին։ Փորձեք օրինակ վերցնել նրանցից։
2. Քնի տևողություն
Գիտնականները պնդում են, որ միջինում հասուն մարդը պետք է քնի 7-8 ժամ։ Սակայն հիշեք, առողջ քունն անխախտ քունն է։ Ավելի օգտակար է քնել 6 ժամ առանց ընդմիջումների, քան 8 ժամ քնի խափանումներով։
3. Մի մնացեք անկողնում արթնանալուց հետո
Վտանգն այս հարցում նորից քնելն է։ Բացի այդ, օրգանիզմը պետք է սովորի, որ օրը սկսվում է հենց այդ ժամից։ Մի քանի փորձ ու նման ռիթմը կդառնա սովորական ձեզ համար։
4. Խուսափեք օրգանիզմն առույգացնող գործողություններից
Խորհուրդ է տրվում ակտիվ ֆիզիկական աշխատանքով չզբաղվել քնից 1 ժամ առաջ։ Պատրաստեք ձեր օրգանիզմը քնի։
5. Օրվա ընթացքում փորձեք չքնել
Եթե չդիմանաք և քնեք, ապա այն կարող է հանգեցնել քնի խանգարման։
6. Ստեղծեք հարմարավետ և թուլացնող միջավայր ննջարանում
Այսպիսի հարմարավետություն ստեղծելու առաջին նախապայմանը հեռուստացույցի և համակարգչի բացակայությունն է: Այնուհետև շատ կարևոր է օրթոպեդիկ ներքնակի և բարձերի ընտրությունը: Մինչև քնելն օդափոխեք սենյակը, թթվածինն օգնում է արագ և հանգիստ քնել:
7. Չուտել քնելուց առաջ
Փորձեք խուսափել սննդից քնելուց առաջ: Խորհուրդ է տրվում ուտել քնելուց գոնե 2 ժամ առաջ: Բացի այդ, հիշեք, որ ընթրիքը պետք է հնարավորինս թեթև լինի:
8. Ծխելը, սուրճը և ալկոհոլը խոչընդոտում են առողջ քնի: Հրաժարվեք դրանցից հօգուտ առողջության:
