Բարձի հարմար կամ անհարմար լինելը, ինչպես նաև կարճ կյանքը կամ դիմացկունությունը զգալիորեն պայմանավորված է այն նյութերով, որոնք կիրառվել են դրա պատրաստման մեջ։ Իհարկե չպետք է մոռանալ նաև, որ բարձը խնամելու և պահպանելու ձևերը ևս մեծ նշանակություն ունեն դրա հարմարավետության և կյանքի տևողության հարցում։
Բարձերի լցանյութերը տարբեր են։ Ընդհանուր առմամբ դրանք լինում են բնական և արհեստական։
Բնական լցանյութերը կենդանական կամ բուսական ծագում ունեցող հումքերն են։ Անկախ իրենց տեսակից՝ լցանյութերը պետք է բարձի համար ապահովեն մի քանի կարևոր հատկություն․
- Լինեն փափուկ և հարմարավետ
- Կարողանան անատոմիական ճիշտ դիրքով պահել վիզն ու գլուխը
- Չկուտակեն, չկլանեն տհաճ հոտերը
- Կարողանան օդափոխվել, որպեսզի քնած ժամանակ գլուխը չքրտնի
- Չառաջացնեն ալերգիկ ռեակցիաներ
Բարձերի պատրաստման մեջ կիրառվող տարածված բնական լցանյութերն այս կամ այն չափով համապատասխանում են այս չափանիշներին։
Բնական լցանյութերի ո՞ր տեսակներն են ամենատարածվածը
Բնական լցանյութերի մեջ մեծ տարածում ունեն սագի փետուրները։ Որպես կանոն, բարձերի պատրաստման մեջ փետուրների հետ օգտագործվում է նաև սագի աղվամազը, ինչն առավելագույնի է դարձնում բարձի առաձգականությունը և փափկությունը։
Լատեքսը՝ որպես բնական լցանյութ, ևս մեծ կիրառություն ունի բարձերի մեջ։ Այս լցանյութն իր առաձգական բնույթի շնորհիվ՝ կիրառվում է հիմնականում օրթոպեդիկ բարձերի պատրաստման մեջ։ Այն ֆիքսում է վզի և պարանոցի անատոմիական ճիշտ դիրքը, օգնում արյան շրջանառության կարգավորմանը։
Բամբուկի մանրաթելերից պատրաստված բարձերն առանձնանում են յուրահատուկ փափկությամբ, թեթևությամբ, հեշտ օդափոխվելու հատկություններով։ Դրանք հարմար են ինչպես շոգ գիշերներին, այնպես էլ ձմռանը կիրառելու համար։
Բամբակի հատկությունները ծանոթ են շատերին։ Այն առաջին հերթին հիպոալերգիկ, անվնաս հումք է, ինչն էլ անփոխարինելի է դարձնում այն անկողնային պարագաների համար։ Բամբակն իդեալական հումք է զգայուն մաշկ ունեցողների և նրանց համար, ովքեր քնի ընթացքում հաճախ են քրտնում։ Այս լցանյութը կլանում է խոնավությունն ու արագ օդափոխվելով չորանում։ Այն չի կուտակում տհաճ հոտերը, ինչն էլ անկողնային այս պարագան դարձնում է քնի համար կատարյալ միջավայր։
