Ընտրում ենք բամբուկե ծածկոց

Բամբուկը՝ որպես հումք, ծանոթ է մարդկության հազարամյակներ շարունակ։ Նրա հատկությունները՝ ամրությունը, հուսալիությունը, թույլ են տվել մարդկանց այն կիրառել կացարանների, կահույքի և սպասքի պատրաստման մեջ։ Բամբուկն աճում է արևադարձային և մերձարևադարձայի գոտիներում և աչքի է ընկնում արագ աճելու հատկությամբ, հետևաբար այն աճեցնելու, մշակելու համար առանձնապես ջանքեր կամ քիմիական նյութեր անհրաժեշտ չեն, ինչն էլ ապահովում է նրա՝ էկոլոգիապես մաքուր բնույթը։

Վերջին տարիներին բամբուկը մարդկանց սկսել է հետաքրքրել նաև փոքր-ինչ այլ տեսանկյունից։ Լինելով էկոլոգիապես մաքուր հումք՝ նրա մանրաթելերը, հատուկ մշակում անցնելով, լավագույնս կիրառվում են տեքստիլի՝ բարձերի, վերմակների բաղադրության մեջ։ 

Տեքստիլի մեջ կիրառելու համար օգտագործվում են 3-7 տարեկան բամբուկներ։ Մանրաթել դառնալու համար բույսն անցնում է որոշակի փուլերով։ Տարբերում են մեխանիկական և քիմիական մշակում։ Մեխանիկական մշակման ժամանակ բույսը նախ մաքրվում է տերևներից, նրա մնացորդներից, փափուկ հատվածից, ապա մանրացվում է, տեղադրվում հատուկ խոնավ միջավայրում, որպեսզի փափկի։ Արդեն փափկած հումքը մի քանի անգամ մանրամասն զտվում և մաքրվում է, որից հետո արդեն պատրաստվում են 15-20սմ երկարությամբ թելեր, որոնք պատրաստ են շահագործման համար։

Քիմիկական մշակման ժամանակ կիրառվում են նատրիումի և կալիումի լուծույթներ և այլ նյութեր, որոնց մեջ տեղի է ունենում հումքի փափկեցումն ու զտումը։ Այսպիսի մշակման արդյունքում ստանում են կպչուն ֆիբր։

Բամբուկի հիմքով ծածկոցները հարմար են բոլորին և տարվա բոլոր եղանակներին։ Դրանք աչքի են ընկնում իրենց պրակտիկ և հիգիենիկ հատկություններով․

- էկոլոգիապես մաքուր են և ալերգիկ ռեակցիաներ չեն առաջացնում,

- ինքնուրույն օդափոխվում են՝ հեռացնելով գիշերվա ընթացքում կուտակված տհաճ հոտերը

- հեշտ լվացվում են լվացքի մեքենայում և արագ չորանում,

- դիմացկուն են, բավական երկար ժամանակ պահպանում են նախնական տեսքը,

- թեթև են։

Չնայած այն բանին, որ բամբուկի ծածկոցները քիմմաքրման տանելու անհրաժեշտություն չկա, այնուհանդերձ տեղին կլինի հաշվի առնել խնամքի մի քանի կանոն, եթե որոշել եք գնել բամբուկի ծածկոց․

1․ Բամբուկի ծածկոցը գնելուց հետո բացե՛ք փաթեթավորումը և օդափոխե՛ք այն հարթ, հորիզոնական դիրքով փռած։

2․ Լվացքի մեքենայով լվալիս խորհուրդ է տրվում դրանք լվանալ առանց մզման, մինչև 30 աստիճան ջերմաստիճանի տակ։

3․ Լվանալուց հետո բամբուկի ծածկոցն անհրաժեշտ է չորացնել հորիզոնական փռած դիրքով, որպեսզի մանրաթելերը հավասարաչափ բաշխվեն։

4․ Բամբուկի ծածկոցները կլանում են խոնավությունը։ Եթե գիշերային քնի համար դա հիանալի հատկություն է, ապա պահոցում կամ դարակում պահելիս այդ հատկությունը կարող է վնասել հենց ծածկոցը։ Ուստի կարևոր է չօգտագործելու ժամանակ այն պահել չոր վայրում։

5․ Միշտ ուշադրությո՛ւն դարձրեք արտադրանքի պիտակի վրա նշված ցուցումներին։ Դրանք կուղղորդեն, թե ինչպես է պետք խնամել կոնկրետ այդ ծածկոցը։