Մենք անկողնում անց ենք կացնում միջինում 6-8 ժամ, իսկ դրանք մեր օրվա ամենակարևոր ժամերից են, չէ՞ որ հենց այդ ժամերին ենք թոթափում նախորդ օրվա լարվածությունը, հոգնածությունը, հանգստանում և ձեռք բերում նոր լիցքեր հաջորդ օրվա համար։ Հետևաբար մեր ընտրած անկողնային պարագաները նույնքան կարևոր են մեր առողջ քնի և հանգստի համար, որքան ներքնակը և մահճակալը։
Ո՞րն է համարվում հարմար անկողին և ինչպե՞ս կողմնորոշվել գնումներ կատարելիս։
Ասել միանշանակ, թե որ ձևի, գործվածքի և չափսի անկողնային պարագաներն են ամենահարմարը, կստացվի շփոթության մեջ գցել գնորդներին։ Չէ՞ որ մեզանից յուրաքանչյուրը ունի տարբեր է նախասիրությունների։ Մեկին դուր են գալիս ավելի փափուկ գործվածքներին հպվելը, մյուսին՝ համեմատաբար կոշտ, մեկը ալերգիկ հակումներ ունի, իսկ մյուսը հեշտ է քրտնում, ուստի հարկավոր է օդափոխվող գործվածք։
Ուստի ճիշտ կողմնորոշվելու համար անհրաժեշտ է առանձին-առանձին դիտարկել անկողնային պարագաների՝ շուկայում տարածված գործվածքները և ձևերը, ապա ընտրել դրանցից մեզ ամենահամապատասխանը։
Այսպիսով, ըստ տարածվածության՝ անկողնային պարագաների ամենաշատ հանդիպող գործվածքներն են․
Բամբակը
Բամբակը համարվում է ամենահարմար գործվածքը անկողնային պարագաներ պատրաստելու համար։ Այն երկարակյաց է, էկոլոգիապես մաքուր, ալեգիա չի առաջացնում, և ի վերջո հաճելի է նրան հպվելը։ Միակ թերությունը թերևս մանրաթելերի կոշտությունն է, որը կարող է բարդացնել արդուկելու գործընթացը։
Սատին
Սատինը, չնայած իր համեմատաբար բարձր արժեքին, ևս լայն տարածում ունի անկողնային պարագաների պատրաստման մեջ։ Պատրաստման հատուկ տեխնոլոգիան այն դարձրել է ամուր ու ձիգ, բայց միևնույն ժամանակ հպման համար նուրբ ու հաճելի գործվածք։ Սատինը դիմացկուն կտոր է՝ թանձր տեքստուրայով, ուստի այս գործվածքից պատրաստված անկողնային պարագաները նախընտրելի է կիրառել հիմնականում ցուրտ եղանակներին։
Չիթ
Իզուր չէր, որ գործվածքը լայն կիրառություն ուներ խորհրդային ժամանակներում։ Չիթն ամբողջովին բնական հումքից պատրաստված, ձիգ գործվածք է, որը թույլ է տալիս մարմնին շնչել, այդ պատճառով էլ հաճախ է կիրառվում մանկական սպիտակեղենի պատրաստման մեջ։ Չթի միակ թերությունը, թերևս, կյանքի կարճ տևողությունն է։
Մետաքս
Փայլուն, հարթ ու ձիգ մետաքսը բնական գործվածք է և պատրաստվում է շերամի թրթուրներից։ Մարդկությանը հնուց ծանոթ այս գործվածքը միշտ համարվել է շքեղության խորհրդանիշ։ Մետաքսը այնքան պահանջկոտ է իր խնամքի հարցում, որ ժամանակից լվացքի մեքենաներն անգամ հատուկ ռեժիմ ունեն մետաքսյա գործվածքի լվացման համար։ Այնուհանդերձ հաճելի է մետաքսյա անկողնու մեջ քնելը, այն կլանում է խոնավությունը և արագ էլ չորանում՝ ապահովելով հանգիստ ու անհոգ քունը։
Վուշ
Հիպոալերգեն հատկությամբ, դիմացկուն, օդափոխվող վուշը չի քրտնեցնում, թողնում է մարմնին ազատ շնչել։ Սակայն բավական կոշտ մակերեսի պատճառով անկողնային պարագաների արտադրության մեջ չունի այն տարածվածությունը, ինչն ունեն օրինակ սատինը կամ բամբակը։
Արհեստական գործվածքներ
Արհեստական գործվածքները սինթետիկ են, սովորաբար բաղադրության մեջ ունենում են պոլիեսթեր և ի տարբերություն բնական գործվածքների՝ երկարակյաց չեն։ Դրանք հեշտ են լվացվում, արդուկվում, և իհարկե ավելի մատչելի գին ունեն։ Սակայն կարող է վտանգավոր լինեն առողջության համար, քրտնեցնեն կամ ալերգիա առաջացնեն։
Թե ինչպես կողմնորոշվել անկողնային պարագաների չափսի մեջ, կանդրադառնանք հաջորդ հրապարակման մեջ։
