Վերմակի երկարակեցությունը կախված է նրանում օգտագործված նյութերից, բայց և մեծ դեր ունի ճիշտ խնամքը։ Ընդհանուր առմամբ բոլոր տեսակի լցանյութերը պարբերաբար խնամքի կարիք ունեն՝ պայմանավորված իրենց առանձնահատկություններով։
Նախորդ հրապարակման մեջ մենք խոսել ենք այն մասին, թե ինչ խնամքի կարիք ունեն բրդյա, փետուրե, սինտեպոնե լցանյութերով վերմակները։ Մյուս տեսակների խնամքի մասին կխոսենք ստորև։
Բամբակե վերմակները մեծ տարածում ունեն վերջին տասնամյակներում։ Դրանք շատ բարձր արժեք չունեն և աչքի են ընկնում օդափոխվելու ճկուն հատկությամբ։ Բամբակե վերմակները հարմար անկողնային պարագա են նորածինների, փոքրիկների համար, քանի որ թեթև են, չեն քրտնեցնում և ճիշտ խնամելու դեպքում տհաճ հոտեր չեն կլանում։
Բամբակե վերմակները տան պայմաններում լվանալը գրեթե անհնար է, նույնը վերաբերում է նաև լաքաների հեռացնմանը։ Փոխարենն անհրաժեշտ է պարբերաբար հանձնել քիմմաքրման, իսկ տնային պայմաններում կատարվող խնամքը կարող է սահմանափակվել բաց տարածքում օդափոխելով։
Հոլոֆայբերը էկոլոգիապես մաքուր լցանյութ է։ Այն ունի ջերմությունը պահպանելու հատկություն, ինչի պատճառով էլ հաճախ այն կիրառվում է որպես վերարկուների լցանյութ։ Այս լցանյութից պատրաստված վերմակների խնամքը բարդ չէ։ Դրանք կարելի է հանգիստ լվանալ լվացքի մեքենայով՝ առանց քամելու ռեժիմի։ Այնուհետև անհրաժեշտ է չորացնել հարթ մակերեսի վրա փռած՝ պարբերաբար փոփոլացնել, որպեսզի հավասարաչափ տարածվի։
Նույնչափ հեշտ խնամք են պահանջում նաև միկրոֆիբրից պատրաստված վերմակները։ Դրանք ևս կարիք ունեն պարբերաբար օդափոխման, փարթամացման, իսկ լվանալ կարելի է լվացքի մեքենայի մեջ 60ºС-ի պայմաններում և չորացնել հարթ մակերեսի վրա՝ ինչպես հոլոֆայբերը։
Բամբուկե վերմակները, չնայած բնական հումքից են պատրաստված, այդքան էլ պահանջկոտ չեն խնամքի տեսանկյունից։ Դրանք հաճախակի պահանջում են չոր մաքրում ու օդափոխում։ Միակ խնդիրը դրանց պահպանման մեջ է։
Բամբուկե հումքից պատրաստված վերմակների մեծ թշնամին խոնավությունն է, որը նրանք կարող են կլանել օրինակ պոլիէթիլենային տոպրակների մեջ, եթե այդ պայմաններում են պահվում։ Խոնավությունը կարող է հանգեցնել նեխման, ինչի հետևանքով կարող են վերմակի մեջ հայտնվել միջատներ։
Թեև արտադրողները վստահեցնում են, որ 40-60ºС պայմաններում սովորական լվացքի մեքենայով լվանալիս բամբուկե վերմակները չեն վնասվի, այնուամենայնիվ խորհուրդ ենք տալիս չչարաշահել խնամքի այդ տարբերակը և պարբերաբար հանձնել քիմմաքրման։
Առանձին խմբում կարելի է դասակարգել տարբեր սինթետիկ նյութերից պատրաստված վերմակները։ Այդպիսի նյութերից են պոլիէսթերը, ակրիլը և այլն։ Պարբերաբար օդափոխելը, փարթամացնելը պարտադիր խնամքի պայման են այս տեսակի ներքնակների համար, քանի որ դրանք հատկություն ունեն իրար կպչելու, գնդերի վերածվելու։ Դրանք կարելի է լվալ լվացքի մեքենայի մեջ՝ նուրբ գործվածքների համար նախատեսված ռեժիմով, իսկ չորացնելիս քանդել առաջացած գնդերը և փռել հարթ մակերեսի վրա։
