Յուրաքանչյուրս ունենք անկողնու փափկության կամ կոշտության, տաքի և զովի մեր պահանջները, ուստի ինչպես ներքնակի կամ բարձի, այնպես էլ վերմակի ընտրության ժամանակ շատ կարևոր է հիմնվել մեր օրգանզիմի պահանջմունքերի վրա։
Սակայն անկախ մեր նախապատվությունից, լավ վերմակը պետք է համապատասխանի սանիտարահիգիենիկ պահանջներին, այսինքն՝ լինի օդափոխվող, հակաալերգիկ, եթե ալերգիայի ռիսկ կա և չգրգռի մաշկը։ Իսկ այդ հատկանիշները, ինչպես նաև վերմակի կոշտ կամ փափուկ լինելը, գիշերը ստեղծված տաք կամ զով միջավայրը, պայմանավորված են վերմակի բաղադրության մեջ կիրառված լցանյութով և գործվածքով։
Եկե՛ք դիտարկենք, թե ինչ լցանյութ ընտրել, որպեսզի մեր վերմակն ապահովի ճիշտ ջերմաստիճան, չվնասի մեր առողջությանը և լինի դիմացկուն։
Ընդհանուր առմամբ լցանյութերը լինում են 2 տեսակի՝ արհեստական և բնական։ Բնական լցանյութերի հիմնական տեսակներն են՝ փետուր, ոչխարի բուրդ, ուղտի բուրդ, քաշեմիր, բամբուկ, էվկալիպտ, վիսկոզա, մետաքս և բամբակ։
Նշվածներից ոչխարի և ուղտի բրդից լցանյութերը հայտնի են տաքացնող հատկությամբ և երկարակեցությամբ։ Սակայն այս լցանյութերով վերմակները խորհուրդ չեն տրվում ալերգիկ հակումներ ունեցող անձանց։
Մինչդեռ բամբակի հիմքով վերմակները ամենահարմարն են այն դեպքերում, երբ անձն ունի ալերգիկ հակումներ։ Այս վերմակները հեշտ են օդափոխվում՝ ապահովելով ճիշտ ջերմաստիճան, չեն թողնում իրենց մեջ բնակվեն տարատեսակ միջատներ, չեն գրգռում մաշկը։
Սակայն թե՛ բուրդը, թե՛ բամբակը խնամքի հարցում պահանջկոտ են։ Տնային պայմաններում դրանց լվացումը բարդ է, ուստի խորհուրդ է տրվում հանձնել քիմմաքրման։
Մեծ տարածում ունի փետուրի (սագի, կարապի և այլն) հիմքով լցանյութը։ Այս հիմքով են պատրաստված վերմակները, թեև շատ թեթև են, բայց աչքի են ընկնում ապահոված ջերմությամբ։ Հեշտ են օդափոխվում, չեն էլեկտրականանում, առաձգական են և դիմացկուն, սակայն ևս պահանջկոտ են խնամքի հարցում։
Ինչ վերաբերում է բամբուկին և մետաքսին և մնացած բնական լցանյութերին, ապա դրանք աչքի են ընկնում դիմացկունությամբ, փափկությամբ, էլաստիկությամբ, օդափոխվելու հատկությամբ, հակաալերգիկ բնույթով և խնամքի հեշտ պահանջներով, սակայն ի տարբերությունը բրդի և բամբակի, ավելի թանկ արժեն։
Վերմակների սինթետիկ լցանյութերի թվին են պատկանում սինտեպոնը, հոլոֆայբերը, արհեստական փետուրները և այլն։ Սինթետիկ հիմքով վերմակները, որպես կանոն, հակաալերգիկ են, համեմատաբար ցածր արժեք ունեն և շատ հեշտ են խնամվում։
Անկախ նրանից, թե ինչ հիմքով վերմակ ենք ընտրում, կարևոր է, որ գործածելու ընթացքում ևս խնամքով վերաբերվենք վերմակին, որպեսզի հնարավորինս երկարացնենք նրա կյանքը։ Ուստի խորհուրդ է տրվում վերմակը պարբերաբար օդափոխել, թափ տալ, որպեսզի լցանյութը չկծկվի, այլ հավասարաչափ բաշխվի։ Կարևոր է չմոռանալ նաև վերմակի ծրարի մասին, որը կկանխի վերմակի կեղտոտվելը և մաշվելը։
