Թե ինչ ազդեցություն կունենա ներքնակը մեր քնի և ողնաշարի վրա, մեծապես կախված է նրա բաղադրությունից։ Ժամանակակից ներքնակների բաղադրությունը բազմազան է՝ ստեղծված ամենատարբեր նպատակների ու կարիքների համար, հետևաբար կարելի է ասել, որ ներքնակի ընտրությունը մեծ հաշվով անհատական ընտրության հարց է։
Ընդհանուր առմամբ ներքնակները բաղկացած են երկկողմանի մթելից, մի կամ մի քանի տեսակի լցանյութային շերտից և զսպանակային բլոկից։ Իհարկե կան նաև ներքնակներ, որոնցում զսպանակային բլոկը բացակայում է։
Ի՞նչ է ներքնակի մթելը, և ինչու է կարևոր նրա հումքը։
Ներքնակի մթելը նրա արտաքին գործվածքն է, որն ամենամոտ շփումն ունի մեր մարմնի հետ, հետևաբար կարևոր է, որ այն լինի օդափոխվող, շնչող, չքրտնեցնի և չկլանի տհաճ հոտերը։ Սինթետիկ բաղադրություն ունեցող մթելների դեպքում ներքնակի օդափոխությունը դժվար է տեղի ունենում, արդյունքում այն իր մեջ կլանում է քրտինքը և տհաճ դարձնում գիշերային հանգիստը։ Փոխարենը բամբակյա հումքից մթելները ստեղծում են քնի համար հարմարավետ և առողջ միջավայր։
Լցանյութի ի՞նչ տեսակներ գոյություն ունեն
Լցանյութը ներքնակի բաղադրության ամենաէական մասերից մեկն է։ Այն կարող է լինել մեկ կամ մի քանի շերտերից բաղկացած, որոնք նպատակ ունեն ուժեղացնելու մեր ներքնակի այս կամ այն կարևոր հատկությունը։
Լցանյութերի ամենատարածված տեսակներից մեկը կոկոսի մանրաթելերն են։ Դրանք աչքի են ընկնում օրթոպեդիկ, ինչպես խոնավություն կլանելու և ժամանակի նկատմամբ դիմացկուն իրենց հատկություններով։ Այդ պատճառով կոկոսի մանրաթելերի կիրառությունը շատ տարածված է մանկական ներքնակների մեջ։
Մեծ տարածում ունեն նաև ձիու մազի կամ թաղիքի կիրառությունը ներքնակներում։ Լցանյութի այս տեսակներն առաձգականություն և ամրություն են հաղորդում ներքնակներին, ապահովում դրանց դիմացկունությունը։
Ներքնակի անհրաժեշտ փափկությունը և առաձգականությունն ապահովում են նաև պենոպոլիուրետան, լատեքս, հիշողության սպունգ կոչվող լցանյութերը, որոնք բացի փափկությունից, ունեն նաև օրթոպեդիկ հատկություն։
Ինչո՞ւ է կարևոր զսպանակային բլոկի ընտրությունը
Զսպանակային բլոկը ներքնակի հիմքն է, որի տեսակից և որակից է կախված թե՛ մեր գիշերային հանգստի հարմարավետությունը, թե՛ ներքնակի երկարակեցությունը։
Ներկայումս շուկայում տարածված են երկու տեսակի զսպանակային բլոկ՝ կապակցված կամ Bonnel և անհատական կամ Pocket Spring։ Անհատական զսպանակներից բաղկացած բլոկն ունի օրթոպեդիկ հատկություն։ Այս տեսակի ներքնակները ճռռոց չեն առաջացնում գիշերվա ընթացքում շարժվելիս և որ ամենակարևորն է՝ ծառայում են երկար տարիներ։ Կապակցված զսպանակային բլոկ ունեցող ներքնակներն ավելի մատչելի են, սակայն ամուր պողպատից պատրաստված լինելու դեպքում դրանք ևս կարող են ծառայել երկար տարիներ։
