Վերջին շրջանում տեքստիլ արտադրության ոլորտում լայնորեն կիրառվում է լատեքս կոչվող նյութը: Հիմնականում այն պահանջարկ է վայելում ներքնակների լցանյութերի համար, քանի որ ունի մի շարք անհրաժեշտ հատկություններ: Քնելու համար այդպիսի լցանյութով պատրաստված ներքնակները համարվում են որակյալ, ապահով և պրակտիկ: Շատ գնորդներ հենց այս նյութով լցված ներքնակներին էլ տալիս են իրենց նախապատվությունը: Իսկ դուք գիտե՞ք, թե ինչպես է ստացվում լատեքսը, ինչ առավելություննե և թերություններ ունի այս նյութը: Առաջարկում ենք ծանոթանալ և ներքնակ գնելիս ուշադրություն դարձնել որոշ առավելությունների:
Լատեքսի տեսակները
Ժամանակակից լատեքսը, որն օգտագործվում է ներքնակների արտադրությունում, բաժանում են 2 հիմնական կատեգորիայի՝ բնական և արհեստական
Կախված ծագումից, այս նյութը տարբեր կազմություն է ունենում, ինչպես նաև տարբերվում է որոշակի առանձնահատկություններով և գնով: Այս հրապարակմամբ ձեզ կներկայացնենք բնական լատեքսի պատմությունն ու կիրառությունը
Բնական լատեքս
Այս նյութը ստանում են հատուկ տրոպիկական ծառի՝ հիմնականում բրազիլական հևեա կոչվող ծառի կաթնահյութից: Ծառի վրա կտրվածքներ են անում, որից սկսում է կաթնանման հեղուկ ծորալ: Այն հավաքվում է և հետագայում տարբեր մշակումներ անցնելով պիտանի դառնում օգտագործելու համար: Այսպիսի կաուչուկը բացառապես բնական ծագում ունի, էկոլոգիապես մաքուր է և անվնաս առողջության համար: Սակայն, բնական լատեքսը ունի ոչ միայն առավելություններ, այլ նաև թերություններ: Այս նյութը հետզհետե քանդվում է արևի ուղիղ ճառագայթների ներքո: Որպեսզի այս բնական նյութի կիրառությունը պրակտիկայում ավելի մեծանա, հիմնականում դրա հետ օգտագործում են հատուկ հավելանյութեր, օրինակ՝ մոնոմեր իզոպրեն:
Բնական լատեքսից պատրաստված ներքնակների առավելությունը
Բարձր առաձգականություն: Էլաստիկությունը համարվում է կողմնորոշիչ որակ, որը պետք է ունենա ներքնակը: Այդպիսի ներքնակները քնի ընթացքում ճիշտ դիրքում են պահում մարդու մարմինը: Բնական լատեքսից ներքնակները չեն ճոճվում, հարմար են:
Դիմացկունություն: Լատեքսային փրփուրը որակով է, համարում է երկարակյաց նյութ ու նույնիսկ մեծ ծանրության պարագայում չի կորցնում իր որակը, չի դեֆորմացվում:
Հիգիենիկություն: 100%-անոց լատեքսից ներքնակներում ոչ մի միջատ կամ միկրոօրգանիզմներ չեն զարգանում և մարդու առողջությունը չեն վտանգում:
Հակաալերգիկ: Որակյալ ներքնակներն ալերգիկ ռեակցիաներ չեն առաջացնում, այդ իսկ պատառով ասթմա կամ այլ շնչառական հիվանդություններ ունեցող մարդկանց համար լիովին անվնաս են համարվում:
Օդափոխություն: Բնական լատեքսից ներքնակները լավ օդափոխվում են, խոնավություն չեն հավաքում:
Ջերմակարգավորում: Լատեքսի շնորհիվ ձմռանը ներքնակն ապահովում է հաճելի ջերմություն, իսկ ամռան տապին պարգևում է զովություն:
