Վաղ առավոտյան աշխատանքի գնալիս երբեմն ինքներս մեզ խոստանում ենք, որ տուն գալուն պես մի քիչ կքնենք ու կկշտանանք քնից։ Քնի պակասը կարող է ազդել ոչ միայն օրվա մեր տրամադրության, ինքնազգացողության, այլ անգամ մեր առողջության վրա։ Այնուհանդերձ մեզանից շատերը կարողացել են ցերեկային քունը դարձնել սովորություն և դրանից օգուտ քաղել։ Իսկ Միջերկրական ծովի ավազանի որոշ ժողովուրդներ ցերեկային քունը համարում են իրենց օրվա կարևոր և անհրաժեշտ մասը։
Այսպիսով, օգտակա՞ր է արդյոք այդքան ցանկալի ցերեկային քունը և կարո՞ղ է փոխարինել գիշերային քնին։
Աշխարհի տարբեր մասնագետներ իրենց բազմաթիվ հետազոտությունների արդյունքում եկել են այն եզրակացության, որ ցերեկային կարճատև քունը բարենպաստ ազդեցություն ունի ուղեղի աշխատանքի համար։
Ապացուցված է, որ օրական 15-30 րոպե քնի սովորությունը օգնում է լիցքաթափվել և վերականգնել ուժերը։
Փոքր երեխաները, որոնք օրվա մեջ հարյուրավոր հարցեր են տալիս ծնողներին, դաստիարակներին և ուսուցիչներին, մուլտֆիլմեր են նայում և խաղում, ցերեկային քնի ընթացքում մարսում են այդ հսկայածավալ ինֆորմացիան և արթնանում են թարմ և նոր էներգիայով լեցուն;
Բժիշկները կանոնավոր ցերեկային քուն են խորհուրդ տալիս նաև ուսանողներին։ Այս խմբի համար ցերեկային քնի կարևորությունն ԱՄՆ-ի գիտնականներն ապացուցեցին հետաքրքիր հետազոտությամբ․ ուսանողներին բաժանեցին երկու խմբի և առաջադրեցին մեկ օրվա ընթացքում կատարել 4 թեստ։ Առաջին երկու թեստը բոլոր մասնակիցները հանձնեցին հաջողությամբ։ Սակայն առաջին խումբը, որը ցերեկը չէր քնել, հաջորդ երկու թեստը հանձնեց վատ արդյունքներով։ Մինչդեռ երկրորդ խմբի ուսանողներին թույլատրվել էր ցերեկը 20 րոպե քնել, և նրանք վերջին երկու թեստը հանձնեցին նույն հաջողությամբ ինչպես նախորդ երկուսը։
Կա՞ն կանոններ ցերեկային քնի համար
Ինչպես արդեն նշեցինք, 15-30 րոպեն համարվում է ցերեկային քնի ամենաօպտիմալ տևողությունը։ Այդ րոպեների ընթացքում չենք հասցնում խորը քուն մտնել, իսկ դա նշանակում է, որ նաև հեշտությամբ կկարողանանք արթնանալ։ Ի դեպ, արթնանալու գործընթացը հեշտացնելու համար նույնիսկ խորհուրդ է տրվում քնից առաջ սուրճ կամ սև թեյ խմել, որոնք կսկսեն գործել հենց 15 րոպե անց և կօգնեն ավելի հեշտ արթնանալ։
Մինչդեռ ավելի երկար քնելով հնարավոր է ողջ երեկո թմրածության զգացողություն ունենանք, չկարողանանք կենտրոնանալ աշխատանքի կամ ուսման վրա, իսկ գիշերն էլ տառապենք անքնությունից։ Իսկ որպեսզի մեր ցերեկային քունն այնուամենայնից չազդի գիշերայինի վրա, անհրաժեշտ է պահպանել ճիշտ գրաֆիկ և ննջել ժամը 14․00-16․00-ի միջակայքում։
Ի դեպ, շատ ընկերություններ, կարևորելով ցերեկային քնի բարենպաստ ազդեցությունը աշխատանքի արդյունավետության վրա, ստեղծում են հարմար պայմաններ, որպեսզի իրենց աշխատակիցները մի քանի րոպեով կարողանան ննջել և հանգստանալ, ապա դրական լիցքերով շարունակեն աշխատանքը։
