Օրթոպեդիկ ներքնակներն աչքի են ընկնում իրենց ամրությամբ, դիմացկունությամբ և երկարակյացությամբ։ Սակայն շատ հաճախ սխալ խնամքի կամ առհասարակ խնամքի բացակայության հետևանքով այդ ներքնակների կյանքը կրճատվում է, դրանք շարքից դուրս են գալիս՝ դառնալով առողջության համար անպետք ու վնասակար։
Կա՞ն արդյոք խնամքի կանոններ, որոնք պետք է պահպանել օրթոպեդիկ ներքնակ օգտագործելիս
Օրթոպեդիկ ներքնակների դեպքում, ինչպես նաև ոչ օրթոպեդիկների, շատ կարևոր է մաքրության պահպանումը։ Փոշին, խոնավությունն ու կեղտը ցանկացած ներքնակի թշնամին են, իսկ օրթոպեդիկների դեպքում, պայմանավորված դրանց ավելի բարդ կոնստրուկցիայիով, այդ թշնամիները հայտնվելով ներքնակի ներսում, սողոսկելով զսպանակների արանքները, շատ արագ մաշում են դրանք, պատճառ դառնում ճռռոցի առաջացման, վնասակար բակտերիաների ու սնկերի ձևավորման համար, որոնք էլ իրենց հերթին ալերգիայի և մաշկային հիվանդությունների առիթ են դառնում։
Օրթոպեդիկ ներքնակը տանը մանրամասն մաքրել, լվանալ հնարավոր չէ։ Այս հարցում պետք է դիմել մասնագետների օգնությանը, տանել ներքնակը քիմմաքրման։ Կարելի է փոշեկուլի փոքր և թեթև գլխիկով վերցնել փոշին, իսկ լաքաները սրբել թույլ օճառաջրով՝ խուսափելով քիմիական ագրեսիվ նյութերից։ Օճառաջուր օգտագործելուց հետո անհրաժեշտ է օդափոխել սենյակը և թողնել, որպեսզի ներքնակը ինքնուրույն չորանա և չօգտագործել վարսահարդարիչ կամ չորացնող այլ պարագա։
Այնուհանդերձ տան պայմաններում հնարավոր է կանխել կեղտոտվելը՝ օգտագործելով ներքնակերես, որը թույլ չի տա կեղտի ներթափանցումը ներքակի շերտեր։
Ինչպես նշեցինք, օրթոպեդիկ ներքնակի կառուցվածքը բարդ է․ այն, որպես կանոն, կառուցված է չկապակցված, անհատական զսպանակների բլոկի հիմքի վրա, որը շատ պահանջկոտ է խնամքի տեսանկյունից։ Այս տեսակի ներքնակները պարբերաբար պետք է շրջել, որպեսզի բլոկի բոլոր կողմերը հավասարապես օգտագործվեն և ճկումը լինի համաչափ։ Ընդ որում շրջել անհրաժեշտ է ոչ միայն երկու երեսները, այլ նաև կողմերը՝ գլխի հատվածը տեղափոխելով ոտքերի մոտ։
Թեև հայտնի է, որ չկապակցված զսպանակային բլոկի դեպքում մի քանի զսպանակի ճկումը չի անդրադառնում մնացածի վրա, այնուհանդերձ, եթե դրա վրա կանգնենք կամ երեխաները փորձեն կանգնել կամ թռչկոտել և ողջ ծանրությամբ ճնշում գործադրեն ներքնակի մի կետի վրա, ապա ամենայն հավանականությամբ զսպանակային բլոկը լրջորեն կվնասվի։
Օրթոպեդիկ ներքնակները ցուցված են ծանր քաշ ունեցող մարդկանց, սակայն քաշի յուրաքանչյուր միջակայք ունի օրթոպեդիկ ներքնակի կոշտության և բարձրության իր աստիճանը։ Հետևաբար ժամանակի ընթացքում քաշի մեծ փոփոխությունների դեպքում անհրաժեշտ է վերանայել ներքնակի դիմադրողականության չափը, այլապես ներքնակը կկորցնի իր օրթոպեդիկ հատկությունները։
Օրթոպեդիկ ներքնակների երկար օգտագործման համար շատ կարևոր է այն հիմքը, որի վրա դրվում է այն։ Անչափ կարևոր է, որ մահճակալի հենքը, որի վրա դրվելու է ներքնակը, լինի կոշտ, ուղիղ և ապահովի համապատասխան օդափոխություն, այլապես ժամանակի ընթացքում ներքնակը կարող է խոնավանալ և դեֆորմացվել։ Այսպիսի դեպքերում նախընտրելի են փայտից պատրաստված հենքի ճաղերը, որոնք չեն վտանգի ներքնակի կյանքը և կօգնեն նրան պարբերաբար օդափոխվել։ Արգելվում է օրթոպեդիկ ներքնակների տակ իրեր պահելը․ դրանք ևս կարող են ձևախեղել ներքնակը։
