Մեզանից շատերին է ծանոթ այն զգացողությունը, երբ առավոտյան արթնանալիս զգում ենք մաշկի կարմրածություն, քոր, այտուցներ, հաճախակի փռշտում ենք, դժվարանում ենք շնչել։ Սրանք կարող են հետևանք լինել մի շարք հիվանդությունների, այդ թվում նաև ալերգիայի, որի համար փաստորեն «բարենպաստ» պայմաններ է ստեղծել մեր անկողինը։
Իրականում ալերգիկ հակումներ ունեցող մարդկանց համար բավական դժվար է ընտրել ճիշտ անկողին, որի մեջ քնելը կլինի անհոգ և չի վտանգի առողջությունը։ Իհարկե, մինչև անկողնու ընտրությանը հասնելը, անհրաժեշտ է խորհրդակցել մաշկաբանի հետ, պարզել ալերգիայի պատճառները և ստանալ համապատասխան բուժում։ Սակայն անվնաս անկողին ունենալը ոչ միայն կնվազեցի ալերգիայի առաջացումը, այլ նաև կնպաստի ալերգիայից բուժման ընթացքին։
Կա տարածված մի սովորություն, թե բարձի երեսը հաճախ փոփոխելը կնվազեցնի ալերգիկ ռեակցիները։ Սակայն մաքուր բարձի երեսը միայն հիգիենիկ միջավայր է ստեղծում մաշկի համար, այնինչ ալերգիայի աղբյուրը գտնվում է բարձի լցանյութի մեջ։
Ամենից հաճախ ալերգիկ ռեակցիաներ են առաջացնում փետուրներից պատրաստված միջուկով բարձերը։ Ընդ որում, բարձը քնողին անհանգստություն է սկսում պատճառել միայն որոշ ժամանակ օգտագործելուց հետո։ Սա հետևանք է այն բանի, որ փետուրներից պատրաստված բարձը երկար ժամանակ քիմմաքրման չի ենթարկվել, ինչի արդյունքում նրա միջուկի մեջ բուն են դրել տարատեսակ միջատներ։
Ալերգիկ ռեակցիաների աղբյուր կարող են դառնալ նաև բրդե հիմքով բարձերը, որոնց մեջ ևս կարող են կենսագործունեություն ծավալել զանազան միկրոբներ։ Առհասարակ բնական հումքից միջուկով բարձերը խորհուրդ է տրվում տարին մեկ անգամ տանել քիմմաքրման, որովհետև տնային պայմաններում ձեռքով կամ լվացքի մեքենայով դրանք լվանալը չի ազատում ներսում ապրող միջատներից։
Առողջության համար վտանգավոր են նաև անհայտ արտադրողներից գնված արհեստական հումքով տարատեսակ բարձերը։ Երբեմն գրավիչ փափկություն և ծավալ հաղորդելու համար որոշ արտադրողներ կիրառում են միջուկում առկա մանրաթելերի մշակման քիմիական մեթոդներ, որոնք բարձի վրա քնելը մարդու առողջության համար դարձնում են վտանգավոր։ Այդ շարքում կարելի է դիտարկել նաև տարաբնույթ հոտերի կիրառումը բարձի մեջ՝ իբրև թե քնի համար բուրումնավետ միջավայր ստեղծելու նպատակով։ Ժամանակի ընթացքում հոտը կորցնում է իր հաճելի բնույթը, իսկ դրա աղբյուրը սկսում է վտանգ ներկայացնել շնչառական օրգանների համար։
Ի՞նչ անել, որպեսզի բարձն ալերգիկ ռեակցիաներ չառաջացնի
Բարձի և առհասարակ անկողնային պարագաների մշտական խնամքը կանխում է ոչ միայն ալերգիայի առաջացումը, այլ նաև դրանց վաղաժամ մաշումը։ Բնական հումքից պատրաստված բարձերը անհրաժեշտ է պարբերաբար թափ տալ, օդափոխել, թույլ չտալ, որպեսզի դրանք խոնավանան, քանի որ խոնավությունը և փոշին են հենց միջուկի փտելու և միջատներով լցվելու գլխավոր պատճառները։
Ինչպես նշեցինք, պետք չէ մոռանալ նաև բարձերի քիմմաքրման մասին, որոնք ևս շատ կարևոր են բարձի կյանքը երկարացնելու, իսկ մեր առողջությունը չվտանգելու համար։
