Բարձերը մեր հանգիստը դարձնում են հարմարավետ, օգնում են վայելել քունը, սակայն երբեմն ժամանակին չխնամելու հետևանքով հենց բարձերն են դառնում անքնության և քնի հետ կապված խնդիրների պատճառ։
Իսկ ե՞րբ հասկանալ, որ բարձը փոխելու ժամանակն է։
1․ Երբ այն կորցրել է նախնական տեսքը
Ի տարբերություն, օրինակ, նույն լցանյութից պատրաստված վերմակի, բարձերն ավելի կարճ կյանք ունեն, քանի որ ստիպված են իրենց վրա ծանրություն կրել, անմիջականորեն կլանել խոնավությունը և այլն։ Եվ երբ բարձը ժամանակի ընթացքում կորցնում է իր նախնական փարթամ ու փափուկ տեսքը, ուրեմն բարձը փոխելու առաջին նախանշանը մեր աչքի առջև է։
2․ Երբ մթելի վրա բծեր են հայտնվել
Մթելի գույնի փոփոխությունը ևս ամենաակնառու նշաններից է, որ բարձի հետ ինչ-որ բան այն չէ, իսկ ավելի կոնկրետ՝ լցանյութի մեջ հայտնվել են բակտերիաներ և բազմանում են։ Նման դեպքերում բարձի մթելի վրա հայտնվում են բծեր ու լաքաներ, հիմնականում՝ դեղնավուն, որոնք լվանալուց հետո չեն վերանում։
3․ Երբ հաճախադեպ են դարձել գլխացավերը
Քնած ժամանակ մեր մկանները, հայտնվելով անհարմար միջավայրում և մեր անկողնային պարագաներից՝ ներքնակից կամ բարձից չստանալով համապատասխան աջակցություն, լարվում են, ինչի արդյունքում արթնանում ենք պարանոցի շրջանի ցավերով, գլխացավով, ճնշման տատանումներով։ Այս բոլորի հիմքում կարող է լինել ոչ հարմարավետ բարձը, որը չունի համապատասխան առաձգականություն, շատ չոր է կամ շատ փափուկ և անհարմար պայմաններ է ստեղծում գլխի ու պարանոցի համար։
4․ Երբ հաճախակի է դարձել խռմփոցը
Թեև խռմփոցն ամեն մարդու «տաղանդ» չէ և մեծապես պայմանավորված է մարդու անատոմիական կառուցվածքից, շնչառական համակարգի ձևից, այնուհանդերձ, եթե դա սկսել է անսպասելիորեն և դարձել հաճախադեպ, ուրեմն կարելի է մտածել նաև բարձի անհարմար լինելու մասին։ Երբեմն հարթ, տափակ բարձի հետևանքով քնած մարդու գլուխը հայտնվում է ցածր հարթության վրա, ինչի հետևանքով քիմքը թուլանում է, և մարդը սկսում է խռմփացնել։ Նման դեպքերում մասնագետի խորհրդատվություն ստանալուց բացի ցանկալի է նաև փոխարինել հին բարձը նոր, ավելի առաձգական բարձով։
5․ Կոկորդի չորություն և քթանցքերի խցանում
Նշված երկու նախանշանները գրեթե նույն բանի հետևանքն են, ինչ խռմփոցը։ Անհարմար, տափակ բարձը գլուխը պահում է ցածր մակարդակի վրա, շնչառությունը սկսում է դժվարանալ, ինչի արդյունքում քնած մարդը ստիպված է լինում շնչել բերանով, ինչն էլ իր հերթին չորություն է առաջ բերում։ Բացի այդ, կոկորդի չորության և քթանցքերի խցանման պատճառ կարող է լինել նաև բարձի մեջ միջատների, բակտերիաների առկայությունը։
Իսկ ի՞նչ անել
Եթե նշված իրավիճակներն արդեն առկա են, ապա դրանցից ազատվելու միակ եղանակը նոր բարձ ընտրելն է, որը կունենա որակյալ բաղադրություն, կլինի համապատասխան առաձգականության և քնի ու առողջության համար անվտանգ։
Իսկ նոր բարձերի կյանքը երկարացնել կարելի է այն պարբերաբար օդափոխելով, ճիշտ խնամք ապահովելով և քիմմաքրման հանձնելով։
