Ներքնակի ընտրության հարցում սովորաբար կարևորում ենք նրա կոշտության չափը, զսպանակների ձևը, օրթոպեդիկ լինել-չլինելը և այլն պայմաններ, որոնք բարենպաստ ազդեցություն են ունենում մեր հարմարավետ քնի, ողնաշարի շտկման, մեջքի ցավերի մեղմման վրա։ Սակայն երբեմն անտեսում ենք ներքնակի լցանյութը, որն էլ հենց պատճառ է դառնում մի շարք անհանգստությունների, այդ թվում նաև՝ ալերգիայի։
Առհասարակ ալերգիան անհատական բնույթ ունի, և դրա պատճառ կարող է դառնալ ցանկացած նյութ։ Ուստի նախ և առաջ պետք է պարզել ալերգիայի պատճառը, որպեսզի ներքնակի ընտրության հարցում խուսափենք ներքնակի կազմության մեջ հենց այդ նյութի առկայությունից։
Ալերգիկ ռեակցիայի պատճառ կարող են լինել վատ օդափոխվող կամ հին ներքնակներում բնակվող միջատները։ Այս պարագայում կարող են արագ օգնության հասնել ներքնավերմակները (ռուս․ наматрасник), որոնք հավելյալ շերտ են ներքնակի վրա և զերծ են պահում մեզ քնի ընթացքում ալերգեն նյութերի հետ շփումից։
Իսկ ավելի խելամիտ լուծում կարող է լինել նոր ներքնակը, որի ընտրության ժամանակ կարևոր է ուշադրություն դարձնել նրա՝ ինքնուրույն օդափոխվելու հատկությանը և ամենակարևորը՝ կազմությանը։
Ո՞ր լցանյութերն են համարվում հիպոալերգիկ։
Բարեբախտաբար ներքնակների արտադրության ժամանակակից տեխնոլոգիաները թույլ են տալիս դրանց կազմության մեջ ներառել այնպիսի լցանյութեր, որոնց շնորհիվ ներքնակը կարողանում է բավարարել առողջության և հանգստի մեր անհատական պահանջմունքները։ Այդպիսի լցանյութերից է համարվում բնական լատեքսը։ Այն պատրաստված է հևեա կոչվող ծառի կաթնահյութից, չունի տհաճ հոտ և թույլ չի տալիս, որպեսզի իր ներսում բազմանան տարատեսակ միջատներ և բակտերիաներ։ Բացի այդ, բնական լատեքսի հիմքով ներքնակները առաձգական են և ունեն օրթոպեդիկ էֆեկտ։
Արհեստական լատեքսը նույնպես միջատներին չի թողնում զարգանալ, «շնչում» է և քանի որ համեմատաբար ավելի կոշտ է, քան բնական լատեքսը, հարմար է ծանր քաշ ունեցող անձանց համար։
Ալերգիկ հակումներ ունեցող անձանց խորհուրդ են տրվում նաև հիշողության սպունգ (memory foam), պենոպոլիուրետան, խոլկոն լցանյութեր պարունակող ներքնակները, քանի որ դրանք «արգելակափակում» են միջատների մուտքը դեպի ներքնակ։ Այդ լցանյութերը չեն ներծծում խոնավությունն ու տհաճ հոտերը, չեն արտազատում քիմիական նյութեր և այդ իմաստով անվտանգ են առողջության համար։
Հիպոալերգիկ հատկություններ ունի սինտեպոնը, որը համարվում է մարդու առողջության համար բացարձակապես անվտանգ լցանյութ։ Ունենալով թեթև քաշ՝ սինտեպոնն ունի ջերմամեկուսիչ հատկություններ, ներքնակի վերին շերտին հաղորդում է ծավալ և փափկություն։ Սակայն սինտեպոնի թերություններից մեկը նրա կարճաժամկետ կյանքն է։
