Ներքնակ ընտրելիս մեզ հետաքրքրում է զսպանակային բլոկի ձևը, լցանյութի տեսակը, բարձրությունը, սակայն այն, թե ինչ գործվածքով է պատված ներքնակը, սովորաբար, զբաղեցում է մեր հետաքրքրությունների վերջին տողը։ Մինչդեռ գործվածքի տեսակն անմիջականորեն ազդում է մեր քնի որակի, ներքնակի ապահոված հարմարավետության զգացողության վրա, չէ՞ որ այն ներքնակի առաջին շերտն է, որի հետ շփվում է մեր մարմինը։
Ներքնակի կամ ներքնակերեսի առջև դրված պահանջները քիչ չեն․ կարևոր է, որ այն լինի ամուր, դիմացկուն, հակաալերգիկ, օգնի մարմնին շնչել, իսկ ներքնակին՝ օդափոխվել։
Ներքնակների արտադրության մեջ կիրառվում են ամենատարբեր գործվածքներ, որոնք այս կամ այն չափով կրում են վերը նշված հատկությունները։ Դիտարկենք տարածված գործվածքներից մի քանիսի հատկությունները․
Ժակկարդ
Չնայած որ դուրեկան նախշերով ժակկարդ գործվածքն ավելի տարածված է փափուկ կահույքի երեսպատման մեջ, այնուհանդերձ իր ամուր, դիմացկուն հատկությունների շնորհիվ՝ այն լայնորեն կիրառվում է նաև որպես ներքնակի գործվածք։ Սինթետիկ թելերի առկայութամբ ժակկարդը ավելի դիմացկուն է դեֆորմացիաների նկատմամբ, սակայն օդափոխության տեսանկյունից այն զգալիորեն զիջում է բամբակե հիմքով իր տեսակին։ Բամբակե ժակկարդի մեջ մոտ 80%-ը հենց բամբակն է, իսկ մնացածը վիսկոզայից (արհեստական թելանյութ) թելեր են։
Տրիկոտաժ
Տրիկոտաժն, առհասարակ, համարվում է հիգիենիկ, հեշտ օդափոխվող գործվածք, և իզուր չէ, որ այն լայնորեն կիրառվում է նաև ներքնազգեստի արտադրության մեջ։ Փափուկ, դիմացկուն այս գործվածքը իդեալական տարբերակ է ներքնակների երեսպատման համար, որովհետև այն թույլ է տալիս ներքնակին դուրս հանել իր մեջ կուտակվող խոնավությունը, տհաճ հոտերը, իսկ մարդու մարմինը չի քրտնեցնում և չի սառեցնում, հիպոալերգիկ է և հակաբակտերիալ։ Հենց այս օգտակար հատկությունների համար էլ տրիկոտաժը խորհուրդ է տրվում մանկական ներքնակների արտադրության մեջ։
Բամբակ
Բամբակի որոշակի քանակություն կարող ենք հանդիպել տարբեր գործվածքներում, օրինակ հենց ժակկարդում կամ պոլիքոթոնում։ Առհասարակ ներքնակի համար նախատեսված բամբակե գործվածքներն աչքի են ընկնում խոնավություն կլանելու, օդափոխվելու հատկություններով։ Բանն այն է, որ բամբակը որքան արագ կլանում է խոնավությունը, այնքան արագ էլ չորանում է՝ թույլ տալով, որ օդը անցնի միջով։
Գոյություն ունեն նաև ջերմակարգավորվող գործվածքներ, որոնք կարողանում ապահովել զով կամ տաք միջավայր՝ կախված սենյակի ջերմաստիճանից։ Haybed-ի ներքնակների հավաքածուի մեջ այդպիսի գործվածքով է պատրաստված Cooler ներքնակը, որն իր՝ ջերմահաղորդակցման և ջերմակլանող հատկանիշների շնորհիվ, կարողանում է տարածել տաք հոսանքը կամ ապահովել զովություն։
