Ժամանակի ընթացքում մեր ներքնակը կարող է կորցնել իր փափկությունը և առաձգականությունը։ Նման դեպքերում ոմանք շտապում են ձեռք բերել նոր ներքնակ, իսկ շատերն էլ երկարացնում են սիրելի ներքնակի կյանքը՝ այն ծածկելով հատուկ շերտով, որը կոչվում է տոպպեր։
Ի՞նչ է տոպպերը և ինչո՞վ է այն տարբերվում ներքնակից կամ ներքնակերեսից
Տոպպերները բարակ ներքնակներ են, որոնցով ծածկում են ներքնակի կամ բազմոցի մակերեսը, որպեսզի վերականգնեն նախկին փափկությունը, առաձգականությունը կամ էլ օրթոպեդիկ հատկությունը։
Տոպպերը ներքնակից ավելի բարակ է։ Նրա հաստությունը սկսվում է 2սմ-ից, մինչդեռ մանկական ներքնակները սկսում են 12սմ-ից, իսկ մեծահասակներինը՝ 15սմ։ Այս բարակությունը պայմանավորված է նաև նրա լցանյութով։ Որպես կանոն դրանք կազմված են մեկ տեսակի նյութի շերտից և ծրարից։ Իհարկե շուկայում գոյություն ունեն նաև երկկողմանի տոպպերներ, որոնք բաղկացած են լցանյութի 2 և ավելի շերտերից և համեմատաբար ավելի բարձր արժեք ունեն։
Ներքնակին ամրանալու համար տոպպերները, ինչպես և ներքնակերեսները, անկյուններում ռետինե ժապավեններ ունեն։ Դրանք օգնում են ամուր ֆիքսել տոպպերը ներքնակի մակերեսին, որպեսզի քնի ընթացքում չտեղաշարժվի։
Ներքնակերեսների հիմնական առաջադրանքը ներքնակը մաքուր պահպանելն է և մարդուն պաշտպանելը ալերգիկ ռեակցիաներից։ Դրանք ավելի բարակ են և կարող են լվացվել լվացքի մեքենայի մեջ։ Մինչդեռ տոպպերները ներքնակին հաղորդում են փափկություն, առաձգականություն, իրենց լցանյութից կախված կարող են ունենալ նաև օրթոպեդիկ հատկություն։
Տոպպերը ներքնակի պես հատուկ խնամք է պահանջում, այն չի կարելի լվանալ լվացքի մեքենայով, քանի որ հնարավոր է կազմությունը վնասվի։ Ուստի խորհուրդ է տրվում տոպպերը և ներքնակը տալ հատուկ չոր մաքրման։
Ի՞նչ լցանյութով տոպպեր ընտրել
Տոպպերի լցանյութը, որպես այդպիսին, նման է ներքնակի լցանյութերի տեսականուն, սակայն, ինչպես նշեցինք, բազմաշերտ չէ։ Թե ինչ լցանյութով տոպպեր ընտրենք, կախված է այն բանից, թե ինչ առաջադրանք ենք դնում տոպպերի առջև։
Եթե ցանկանում ենք մեր կոշտացած ներքնակը դարձնել ավելի փափուկ և առաձգական, ապա խորհուրդ է տրվում ընտրել բնական կամ արհեստական լատեքսով, հիշողության սպունգով կամ հոլոֆայբերով լցված տոպպերներ։ Այս լցանյութերին և դրանց առանձնահատկություններին մենք բազմիցս անդրադարձել ենք մեր նախորդ հրապարակումների մեջ։
Եթե մեր ներքնակին պակասում է կոշտությունը, օրթոպեդիկ էֆֆեկտը, կամ այն շուտ է խոնավանում և քրտնեցնում է գիշերը, ուրեմն ամենահարմար լցանյութն այս պարագայում կոկոսի մանրաթելերն են կամ թաղիքը։ Սրանք, ինչպես հայտնի է, կլանում են խոնավությունը, ձիգ են և առաձգական, հեշտությամբ կրում են մեծ ծանրություններ։ Ի դեպ, նորածինների ողնաշարի ճիշտ ձևավորման համար խորհուրդ են տրվում հենց այս երկու լցանյութերի կիրառությունը ներքնակներում կամ տոպպերներում։
