Գիշերային քնի ժամանակ մեր մարմինը գտնվում է առավելագույն հանգստի մեջ․ այն լիցքաթափվում է, թուլանում, սակայն միշտ չէ, որ մեր անկողնային պայմանները նպաստում են, որ լիցքաթափված ու թուլացած մարմինը հենց այդպես առույգ էլ արթնանա։
Երբեմն չափից դուրս կոշտ կամ չափազանց փափուկ ներքնակները, դրանց մաշվածությունը, շարքից դուրս եկած զսպանակները հնարավոր ամեն բան անում են, որ մենք արթնանանք բռնված մկաններով, ողնաշարի ու պարանոցի ցավերով, թմրած վերջույթներով։
Հետևաբար, որպես վերնագրի մեջ առաջադրված հարցի պատասխան, կարող ենք ասել, որ օրթոպեդիկ ներքնակները ցուցված են առաջին հերթին նրանց, ովքեր առավոտյան արթնանալիս ունենում են մկանային ցավեր կամ լարվածություն։
Սակայն գոյություն ունեն մարդկանց խմբեր՝ հիմնված տարիքի, առողջական պայմանների, քաշի և այլ հատկանիշների վրա, որոնց անմիջականորեն խորհուրդ է տրվում քնել օրթոպեդիկ ներքնակի վրա։
Այդ խմբերից առաջինը նորածիններն են։ Նրանք ողնաշարը դեռ ամբողջովին ձևավորված չէ, իսկ խորդուբորդ և փափուկ ներքնակը միայն կարող է խոչընդոտել ողնաշարի ճիշտ ձևավորմանը։ Այդ է պատճառը, որ մասնագետները, մանկաբույժներն ու օրթոպեդները խորհուրդ են տալիս նորածիններին և մինչև երեք տարեկան երեխաներին քնեցնել օրթոպեդիկ ներքնակների վրա, որոնց մեջ կիրառված է կոկոսի մանրաթելերից շերտ, լատեքս և օրթոպեդիկ հատկություններ ունեցող այլ լցանյութեր։
Հաջորդ խումբը դեռահասներն են։ Թեև նրանց ողնաշարը նորածինների ողնաշարից ավելի ամուր է, բայց դեռևս ձևավորման փուլում է։ Ընդ որում ձևավորման պրոցեսը տևում է մինչև 20-25 տարեկանը, հետևաբար երիտասարդներին ևս խորհուրդ է տրվում կիրառել օրթոպեդիկ ներքնակներ։
Մյուս խումբը, որին անհրաժեշտ է օրթոպեդիկ ներքնակի կիրառությունը, հղիներն են։ Շատ հղիները դժվարանում են հարմար դիրք գտնել հղիության վերջին եռամսյակներում։ Մարմնի ծավալի մեծացումը, աջ կամ ձախ կողմի վրա քնելու՝ բժշկի ցուցումները և այլ հանգամանքներ գիշերային քունը հղիների համար դարձնում են իսկական գլխացավանք։
Հղիության ընթացքում օրթոպեդիկ ներքնակների կիրառության դեպքում ճնշումը կողային մկանների վրա թեթևանում է, ողնաշարը կարողանում է ընդունել հարմար դիրք, իսկ օրթոպեդիկ ներքնակը ֆիքսում է այդ դիրքը և օգնում արյան շրջանառության կարգավորմանը։
Օրթոպեդիկ ներքնակներ խորհուրդ են տրվում հատկապես հենաշարժողական ապարատի խրոնիկ հիվանդություններով տառապող անձանց։ Այդ հիվանդություններից են սկոլիոզը, օստեոխոնդրոզը, միջողային ճողվածքները, արթրիտը։
Նման դեպքերում պահանջվում են օրթոպեդիկ ներքնակների կոշտության տարբեր աստիճաններ։ Թե որն է ավելի նպատակահարմար ձեր դեպքում, գերադասելի է քննարկել բուժող բժշկի հետ։ Որոշ դեպքերում անկողնու օրթոպեդիկ հատկությունները առավելագույնի հասցնելու համար խորհուրդ է տրվում նաև կիրառել օրթոպեդիկ բարձեր գլխի կամ ոտքերի համար։
