Գաղտնիք չէ, որ մեր գիշերային հանգստի որակի, վզի և ողնաշարի ցավերի առկայության գլխավոր «պատասխանատուներից» մեկը բարձն է։ Այդ պատճառով մեզանից շատերը պարբերաբար փորձում են տարբեր ձևերի բարձեր, բնական լցանյութից անցնում են արհեստականի և հակառակը։
Արդյոք կա՞ ընդունված տեսակետ, թե որ լցանյութն է ամենահարմարն ու օգտակարը։
Լցանյութերի բազմազանությունը հենց խոսում է այն մասին, որ մարդկանց պահանջները տարբեր են․ մեկին դուր է գալիս փափկությունը, մյուսին՝ բնական հումքը, իսկ երրորդն ունի ալերգիկ հակումներ և այդպես շարունակ։ Սակայն մի բան կարող ենք հաստատ փաստել, որ այն տարածված կարծիքը, թե արհեստական լցանյութը վնասակար է առողջությանը, իրականության հետ ոչ մի աղերս չունի։
Սինտեպոնը համարվում է առաջին սինթետիկ նյութը, որը սկսեց լայնորեն կիրառվել բարձերի պատրաստման մեջ։ Այն պատրաստված է ջերմային հատուկ մշակում անցած պոլիէսթերային մանրաթելերից: Այդ մշակման արդյունքում վերջիններս ձեռք են բերում ամրություն և հակաալերգիկ բնույթ։
Սինտեպոնից պատրաստված բարձերը մատչելի են և ունեն մի շարք առավելություններ, որոնք էլ ապահովում են այս լցանյութի բարձր տեղը արհեստական նյութերի սանդղակում։
Էկոլոգիապես անվտանգ են
Ի տարբերություն բնական լցանյութերի, սինտեպոնը տարատեսակ միջատների, բակտերիաների ու սնկերի զարգանալու և գործունեություն ծավալելու համար անբարենպաստ միջավայր է։
Հեշտ են օդափոխվում
Սինտեպոնը խոնավադիմացկուն նյութ է։ Արտադրման ընթացքում մանրաթելերը սիլիկոնացվում են, ինչի շնորհիվ խոնավություն չեն քաշում, հետևաբար նաև հեշտ օդափոխվում են։ Սինտեպոնի այս բնույթը նրան զերծ է պահում նաև տհաճ հոտերից։
Հեշտ է խնամելը
Սինտեպոնը հատուկ քիմմաքրման կարիք չունի։ Այն հեշտությամբ լվացվում է լվացքի մեքենայում, արագ չորանում է և ստանում իր նախնական տեսքը։
Սակայն սինտեպոնն ունի նաև մի շարք թերություններ, որոնք անհրաժեշտ է հաշվի առնելիս ընտրություն կատարելիս․
- Սինտեպոնե բարձերը երկարակյաց չեն և մոտավորապես 2-3 տարի ամենօրյա օգտագործումից հետո կարող են շարքից դուրս գալ։
- Երկար կիրառության ընթացքում կարող են ստատիկ էլեկտրականություն կուտակել։ Այս դեպքում կարող են օգնության հասնել բնական գործվածքից պատրաստված բարձի երեսները կամ լվացքի ժամանակ կիրառվող հատուկ անտիստատիկ նյութերը։
- Հարմար չեն ողնաշարի խնդիրներ ունեցող անձանց համար։
Այս թերությունները հատկապես տեսանելի կարող են լինել, եթե սինտեպոնե բարձը կիրառենք որպես անկողնային պարագա, իսկ ահա դեկորատիվ բարձերի դեպքում սինտեպոնը անփոխարինելի, փափուկ ու թեթև լցանյութ է, որի կյանքի տևողությունը համեմատաբար ավելի երկար կարող է լինել։
