Շատերը ներքնակ ընտրելիս սահմանափակվում են տեղում դրա փափկությունը, առաձգականությունը ստուգելով և հումքին թեթև ծանոթանալով։ Այնինչ ներքնակի ընտրությունը կարևոր քայլ է մեր առողջության և հարմարավետ գիշերային հանգստի ապահովման գործում։
Գոյություն ունեն մի շարք տարածված սխալներ, որոնք գնորդներն անում են ներքնակ ընտրելիս։ Կներկայացնենք դրանից երեքը․
1․ Մահճակալի չափերը հաշվի չառնելը
Շատ հաճախ մարդիկ ներքնակ գնելիս նշում են մահճակալի սխալ կամ մոտավոր չափս։ Բանն այն է, որ մահճակալի զբաղեցրած տարածքի չափը և ներքնակի չափը տարբեր թվեր են, և երբ հստակ չգիտենք մահճակալի մեջ ներքնակի համար նախատեսված չափսը, ապա անգամ աննշան տարբերությունը կարող է ճակատագրական լինել մեր ներքնակի շահագործման ընթացքի համար։
Երբ ներքնակն ավելի մեծ է, քան մահճակալի մեջ նրա համար նախատեսված տեղը, ապա այն կարող է ծռվել, դեֆորմացվել և շատ արագ շարքից դուրս գալ։ Ի դեպ, նույնը վերաբերում է ոչ միայն երկարությանը և լայնությանը, այլ նաև բարձրությանը։ Մահճակալների խորությունները տարբեր կարող են լինել, և դրանք պետք է համապատասխանեն ներքնակի բարձրությանը, լինեն ներքնակից մի քանի սանտիմետր ցածր։
2․ Տարիքային և ֆիզիոլոգիական առանձնահատկությունները հաշվի չառնելը
Մեր նախորդ հրապարակումներում բազմիցս խոսել ենք այն մասին, թե ինչ ներքնակներ են խորհուրդ տրվում երեխաներին, դեռահասներին, մեծահասակներին, տարեցներին, ինչպես նաև ողնաշարային տարբեր հիվանդություններ ունեցող մարդկանց, այս կամ այն քաշն ունեցող անձանց։
Վերը թվարկվածներից յուրաքանչյուր խմբի համար նախընտրելի է այս կամ այն կոշտության կամ բաղադրության ներքնակը, որը ոչ միայն կօգնի հարմարավետ քնին, այլ նաև կնպաստի առողջության բարելավմանը։
Այս հարցում չսխալվելու և ճիշտ կողմնորոշվելու համար ծանոթացե՛ք մեր հոդվածներին նշված խմբերին խորհուրդ տրվող ներքնակների վերաբերյալ և դիմե՛ք մասնագետի՝ խորհրդատվության համար։
3․ Բաղադրությունն անտեսելը
Ներքնակի բաղադրությունից է կախված նրա երկարակեցությունը և մեր առողջությունը։ Շատ հաճախ մարդիկ ներքնակ են գնում՝ առանց նրա հումքին և բաղադրությանը մանրամասն ծանոթանալու։ Սա հատկապես տեղի է ունենում այնպիսի դեպքերում, երբ խանութում ներկայացված չեն ներքնակի կտրված տարբերակները։
Կարևորություն տվեք ներքնակի լցանյութերին, դրանց որակին, հումքին, հնարավորինս ավելի շատ տեղեկություն ստացեք դրանց առանձնահատկությունների, օգտակարության, դիմացկունության մասին։ Խնդրե՛ք վաճառողին, որ ձեզ ներկայացնի ներքնակի կտրված տարբերակը, որտեղ ամբողջությամբ երևում են ներքնակի մեջ կիրառված բոլոր նյութերը և բաղադրամասերը։
