Ներքնակի բաղադրությունը միատարր չէ և դրա յուրաքանչյուր բաղադրամաս ունի կյանքի իր տևողությունը։ Ուստի ընդհանուր ներքնակի կյանքի միջին տևողությունը մեծապես կախված է նրա առանձին բաղադրամասերի կյանքի միջին տևողությունից։
Հայտնի է, որ անկախ զսպանակներն ավելի դիմացկուն ու երկարակյաց են Bonnell կապակցված զսպանակային բլոկից, բայց դա չի նշանակում, որ անկախ զսպանակներով ներքնակներն անմրցելի են։ Չէ՞ որ դրանց բաղադրության մեջ կարող է կիրառված լինել անորակ կամ էլ կյանքի կարճ տևողություն ունեցող լցանյութ, որը շատ կարճ ժամանակում կարող է շարքից հանել ամբողջ ներքնակը։
Ինչպե՞ս հասկանանք, որ ժամանակն է փոխելու ներքնակը․
Միայն արտաքին չծռմռված տեսքը բավական չէ, որպեսզի համարենք, որ ներքնակը խնդիրներ չունի։ Ստորև թվարկենք մի քանի «եթե»-ներ, որոնք հուշում են, որ ժամանակն է փոխելու ներքնակը․
- Եթե առավոտյան արթնանալիս հոգնածության զգացողություն ունեք
- Եթե կողքի վրա քնելիս թմրում են ձեռքերը կամ ոտքերը
- Եթե գիշերը դժվար եք գտնում քնելու հարմար դիրք
- Եթե առավոտյան վզի կամ մեջքի շրջանում ցավ եք զգում
- Եթե ձեր երկրորդ կեսը գիշերվա ընթացքում գլորվում է դեպի ձեզ կամ դուք՝ դեպի նա
- Եթե զսպանակները և մետաղական կարկասը ճռռոց են հանում
- Եթե ներքնակը կամ շատ փափուկ է կամ շատ չոր
- Եթե ներքնակի մի մասի վրա հարմար է քնելը, իսկ մյուսի վրա՝ ոչ
- Եթե ներքնակից տարօրինակ հոտ եք սկսել առնել
- Եթե գիշերը կամ առավոտյան ունենում եք ալերգիկ ռեակցիաներ
- Եթե այս կետերից գոնե 2-ը ձեզ ծանոթ են, ուրեմն անհրաժեշտ է այցելել ներքնակների խանութ։
Իսկ ինչո՞ւ է մաշվում ներքնակը․
Ինչպես վերը նշեցինք, ներքնակի երկարակեցության հարցում մեծ դեր ունի նրա բաղադրությունը։ Որքան որակյալ են նրա առանձին բաղադրամասերը և որքան հմտորեն է «կազմած» ներքնակը, այնքան երկար այն ձեզ կծառայի։ Սակայն պետք չէ շարքից դուրս եկած ներքնակի «մեղքը գցել» միայն արտադրողի վրա։ Ներքնակի երկարակեցության հարցում մեծ դեր ունենք նաև մենք՝ օգտագործողներս։ Եթե ունենք նույնիսկ ամենաորակյալ և թանկարժեք ներքնակը, պետք է ճիշտ խնամենք այն, որպեսզի մեզ երկար ծառայի։ Ներքնակի պարբերաբար կամ գոնե տարին 1 շրջելը, օրինակ, կօգնի, որպեսզի ներքնակը օգտագործվի հավասարաչափ և երկար դիմակայի։
