Ներքնակի բարձրությունը նրա հարմարավետության, դիմացկունության և ֆունկցիոնալության կարևորագույն չափորոշիչներից մեկն է, որին սակայն, քիչ գնորդներ են ուշադրություն դարձնում։
Որպեսզի հասկանանք, թե ինչպես կողմնորոշվել ներքնակի բարձրության հարցում, անհրաժեշտ է պատկերացում կազմել այն մասին, թե ինչից է ձևավորվում ներքնակի բարձրությունը։
Պատասխանը պարզ է․ բաղադրությունից։
Օրինակ առանց զսպանակի ներքնակները կարող են լինել թե՛ ցածր (մինչև 10սմ), թե՛ բարձր (20սմ-ից ավելի)։ Տարբերությունը կայանում է միմիայն լցանյութի չափի մեջ։ Ստանդարտ զսպանակային բլոկով ներքնակների բարձրությունը գերազանցում է 15սմ-ն, որովհետև միայն զսպանակային բլոկն արդեն իսկ 14 սմ է։ Մանկական ներքնակների բարձրությունը մինչև 15 սմ է, երբեմն նույնիսկ՝ 18սմ՝ դարձյալ պայմանավորված լցանյութով։
Ինչպե՞ս է հարմարավետությունը պայմանավորվում ներքնակի բարձրությամբ
Բարձր ներքնակի բաղադրության մեջ կարելի է տեղավորել մի քանի օրթոպեդիկ բաղադրիչներ՝ զսպանակային բլոկներ, տարատեսակ լցանյութեր, որոնց համակցված ազդեցությունը ողնաշարի վրա կարող է ավելի տեսանելի դրական արդյունք տալ։
Ծանր քաշի կամ երկուսով քնելու դեպքում ևս ներքնակի բարձրությունը կարևոր է, քանի որ որքան հաստ և բարձր ներքնակը, այնքան լավ է կարողանում ճիշտ բաշխել ծանրությունը և հարմարավետ քուն պարգևել մարդուն։ Ծանրության ճիշտ բաշխումը կանխում է նաև ներքնակի շուտ մաշվելը, քանի որ բարձր ներքնակները ուշ են դեֆորմացվում։
Բարձր ներքնակները նախընտրելի են նաև այն դեպքերում, երբ մարդը գերադասում է քնել հատակին՝ առանց մահճակալի։ Այս դեպքում ներքնակն ապահովում է հատակի սառնությունից և փոշուց օպտիմալ հեռավորություն և նպաստում հարմարավետ և առողջ քնին։
Իսկ եթե այնուամենայնիվ քնում ենք մահճակալի վրա՞։
Ժամանակակից մահճակալները պատրաստվում են ներքնակի համար հատուկ նախատեսված խորությամբ, որպեսզի դրանք քնի ընթացքում չտեղաշարժվեն։ Հենց այդ խորությունն էլ կարող է թելադրել ներքնակի համապատասխան բարձրությունը։
Եթե այդ խորությունը 5սմ է, ապա ներքնակի գերադասելի չափը մինչև 20սմ է։ 6-10սմ խորության դեպքում հարմար են 18-22սմ բարձրությամբ ներքնակները։ Իսկ ավելի խորը, 10-15սմ-ի դեպքում խորհուրդ է տրվում 23սմ և ավելի բարձրություն ունեցող ներքնակների կիրառությունը։
Եթե մահճակալի խորությունը և ներքնակի բարձրությունը համամասնորեն չեն համապատասխանում իրար, ապա շատ հնարավոր է, որ ժամանակի ընթացքում ներքնակը «դուրս լցվի» մահճակալի կողափայտերից և դեֆորմացվի։ Ուստի ներքնակ գնելուց առաջ ցանկալի է չափել մահճակալի խորությունը, որպեսզի ներքնակի ընտրությունն ավելի ճիշտ և հիմնավորված լինի։
