Հղիությունը կնոջ կյանքում ջերմ ու գեղեցիկ զգացողություններից բացի նաև կենսակերպի ու առօրյայի փոփոխության շրջան է։ Սկսած հղիության երկրորդ եռամսյակից շատ կանանց մոտ գիշերային քունը դժվարանում է։
Որպես կանոն, երկրորդ և երրորդ եռամսյակներում բժիշկները հղիներին խորհուրդ են տալիս քնել ձախ կողմի վրա, որը համարվում է մոր և պտղի առողջության համար ամենաբարենպաստ դիրքը։ Մարմնի զանգվածի ավելանալուն զուգահեռ նույնիսկ այս դիրքով քունը կարող է անհարմար լինել կնոջ համար, դառնալ անքնության պատճառ։
Հաշվի առնելով հղի կնոջ ֆիզիոլոգիական բոլոր առանձնահատկությունները՝ կարևոր է, որ ներքնակը, որի վրա քնում է հղի կինը, լինի առավելագույնս հարմարավետ և նպաստի առողջ ու անհոգ քնին։
Իսկ ի՞նչ ներքնակ է խորհուրդ տրվում հղիներին
Հղիության ընթացքում բարձրանում է կնոջ մարմնի ջերմաստիճանը, մաշկը դառնում է ավելի զգայուն, հետևաբար մթելը, որով երեսպատված է ներքնակը պետք է լինի բնական հումքից, օդափոխվող և հիպոալերգեն։ Այն չպետք է կուտակի խոնավությունը և ստեղծի քնի համար վտանգավոր միջավայր։
Պետք է հաշվի առնել նաև այն, որ հղի կնոջ մարմնի զանգվածն ավելանում է, և ներքնակը պետք է կարողանա կրել այդ ծավալը։
Հղի կինը հարմարավետ կարող է քնել միջին կոշտության, այսինքն՝ ոչ շատ փափուկ, ոչ էլ շատ կոշտ ներքնակի վրա։ Փափուկ ներքնակը, թեև առաջին հայացքից հարմար է թվում, չի կարող ապահովել այն օրթոպեդիկ էֆեկտը, որն անհրաժեշտ է կնոջ ողնաշարի աջակցության համար, իսկ չոր ներքնակները կարող են սեղմել երակները, խանգարել արյան նորմալ շրջանառությանը։
Առաձգականությունը ևս կարևոր է հղի կանանց համար նախատեսված ներքնակների համար։ Այդ նպատակով խորհուրդ է տրվում ընտրել այնպիսի ներքնակներ, որոնց բաղադրության մեջ կա բնական լատեքս, հիշողության սպունգ կամ բարձր խտության սպունգ։ Դրանք ներքնակին հաղորդում են նաև չափավոր փափկություն և կնոջ գիշերային հանգիստը դարձնում են հարմարավետ և անհոգ։
Ի՞նչ զսպանակային բլոկ ընտրել
Կապակցված զսպանակային բլոկով ներքնակները երբեմն կարող են ցանցաճոճի տպավորություն ստեղծել, որի վրա քնելը հղի կնոջ համար այդքան էլ հարմար չի լինի։ Սակայն, եթե այնուամենայնիվ որոշել եք որպես մատչելի տարբերակ գնել կապակցված զսպանակային բլոկով ներքնակ, խորհուրդ է տրվում անպայման ուշադրություն դարձնել զսպանակների որակին։ Որակյալ պողպատից պատրաստված, ամուր թրծված զսպանակները կարող են ոչ միայն երկար ծառայել, այլ նաև ապահովել որոշակի առաձգականություն։
Անհատական, չկապակցված զսպանակներով ներքնակներն ամենահարմարն են հղիների համար։ Դրանք ընդունում են կնոջ մարմնի ուրվագիծը և ֆիքսում այն, ինչն էլ օգնում է, որ մկանները թուլանան, արյան շրջանառությունը կարգավորվի։ Այս տեսակի զսպանակային բլոկը նաև կանխում է ողնաշարի և պարանոցի ցավերը, որոնք քիչ չեն հանդիպում հղիության ընթացքում։
