Անկողնային յուրաքանչյուր պարագա իր խնամքն է պահանջում, որից էլ կախված է ոչ միայն տվյալ պարագայի երկարակեցությունը, այլ նաև մեր առողջությունը։
Վերմակները պատկանում են սեզոնային պարագաների թվին։ Այսինքն՝ մեր երկրի կլիմայական պայմաններում կարիք է լինում ձմռանն օգտագործել հաստ վերմակ, իսկ ամռանն ավելի բարակ։ Եվ սեզոնային հանգստի ուղարկելուց առաջ, ապա նաև օգտագործելու ընթացքում անհրաժեշտ է լինում դրանք խնամել համապատասխան այն լցանյութի, որից պատրաստված են վերմակները։
Սկսենք ուղտի բրդից պատրաստված վերմակներից
Չօգտագործվող սեզոնին այս լցանյութով վերմակներն անհրաժեշտ է պահպանել չոր, լավ օդափոխվող տարածքում։ Նախընտրելի է խուսափել պոլիէթիլենային տոպրակների մեջ պահելուց, քանի որ դրանք կարող են ներսում խոնավության ու տհաճ հոտի կուտակման պատճառ դառնալ։
Ուղտի բրդից պատրաստված վերմակները խորհուրդ է տրվում կանոնավոր օդափոխել, լվանալ ձեռքով 30ºС ջրի մեջ։ Չորացնել անհրաժեշտ է հորիզոնական փռած վիճակում։ Քիմմաքրումը ևս կարելի է դիտարկել որպես խնամքի տարբերակ, սակայն քիմմաքրման ենթարկել պետք է տարին երկու անգամից ոչ հաճախ։
Ոչխարի բրդից պատրաստված վերմակներին ծանոթ ենք շատերս մանկության տարիներից։ Սրանք ուղտի բրդի նման ջերմությունը պահպանող, տաք ծածկոցներ են, որոնց երկարակեցությունը ապահովելու համար տարվա մեջ գոնե երկու-երեք անգամ պետք է օդափոխել։ Այս վերմակները ևս խորհուրդ է տրվում լվանալ ձեռքով, չորացնել փռած վիճակում և պահպանել չոր, օդափոխվող տարածքում։
Թռչնի աղվամազից պատրաստված վերմակները միշտ առանձնացել են իրենց փափկությամբ, հեշտ օդափոխվելու հատկությամբ, սակայն այս լցանյութը հատուկ խնամք է պահանջում, իսկ երբեմն՝ առանց մասնագետների հնարավոր չէ լինում գլուխ հանել։
Աղվամազից պատրաստված վերմակների համար խոնավությունն իսկական թշնամի է, հետևաբար ամենամսյա օդափոխումն այս վերմակների երկարակեցության երաշխիքներից մեկը կարող է դառնալ։ Այս վերմակները կարելի է լվանալ նուրբ գործվածքների համար նախատեսված ռեժիմով, սակայն ռիսկի չգնալու համար խորհուրդ է տրվում դիմել քիմմաքրման ծառայության։
Սինտեպոնը բնական հումքից լցանյութերի ամենատարածված փոխարինողն է։ Սինտեպոնե լցանյութով վերմակները ոչ միայն հարմար են և մատչելի, այլ նաև հեշտ է դրանց խնամելը։ Լվացքի մեքենայով լվանալիս դրանք չեն դեֆորմացվում, չեն կորցնում իրենց տեսքը։ Այնուհանդերձ լվացքի մեքենայում անգամ փորձարկումներ անել հարկավոր չէ։ Սինտեպոնե վերմակների համար օպտիմալ է համարվում սինթետիկայի կամ նուրբ գործվածքների համար նախատեսված ռեժիմը, իսկ չորացնել հնարավոր է ինչպես չորանոցում, այնպես էլ բաց օդի մեջ։
Մեր հաջորդ հրապարակման մեջ կխոսենք բամբակից, հոլոֆայբերից, միկրոֆիբրից, բամբուկից և սինթետիկ մանրաթելերից պատրաստված վերմակների խնամքի մասին։
